व्यसनमुक्ती उपचार परिषदेचे आयोजन

पुणे, ता. २० ः मुक्ता चॅरिटेबल फाउंडेशन आणि रोटरी क्लब ऑफ पुणे, कात्रज यांच्यातर्फे ‘व्यसनमुक्ती उपचार’ या विषयावर परिषद आयोजित करण्यात आली आहे. येत्या शनिवार (ता. २६) आणि रविवारी (ता. २७) सकाळी १० ते संध्याकाळी पाच या वेळेत ही परिषद बी. जे. वैद्यकीय महाविद्यालयाच्या एम. जी. सभागृहात होणार आहे. मुक्ता संस्थेतर्फे व्यसनमुक्ती उपचार विषयावर आयोजित केलेली ही चोविसावी परिषद आहे. यामध्ये मानसोपचार तज्ज्ञ, मानसशास्त्रज्ञ तसेच समुपदेशक हे मार्गदर्शन करणार आहे. या विषयाबद्दल सखोल आणि अद्ययावत माहिती घेण्यासाठी डॉक्टर, नर्सेस, समुपदेशक, व्यसनमुक्तीसाठी काम करणारे इच्छुक, समाजसेवक, वैद्यकीय शाखेचे विद्यार्थी व मानसोपचार तज्ज्ञ सहभागी होऊ शकतात, असे आयोजक डॉ. प्रकाश महाजन यांनी सांगितले.