‘दहावीच्या सर्व विषयांची व्यवस्थित तयारी करा’

पुणे, ता. २६ ः ‘‘यश मिळविण्यासाठी वाचन, पठण आणि लक्षात ठेवणे या तीन प्रकारे अभ्यास केल्यास चांगले यश मिळविता येते. शिल्लक राहिलेल्या दिवसांच्या तासांचे योग्य नियोजन केल्यास सर्व विषयांची तयारी व्यवस्थित होऊन उत्तम यश मिळेल. दहावीची परीक्षा ही आयुष्याला दिशा देणारी आहे,’’ असे मत उपशिक्षणाधिकारी कृष्णकांत चौधरी यांनी व्यक्त केले.

हरिभाऊ बळवंतराव गिरमे माध्यमिक व ज्युनिअर कॉलेजमध्ये परीक्षेला सामोरे जाताना हा पालक-विद्यार्थी-शिक्षक परिसंवाद आयोजित केला होता, त्यात ते बोलत होते. यावेळी परिसंवादात ३०० विद्यार्थी-पालक सहभागी झाले होते. कार्यक्रमाला विद्यालयाचे प्राचार्य संजीव यादव, उपप्राचार्य शिवरकर विजया, पर्यवेक्षक विजय गोरे, पालक-शिक्षक संघाच्या सचिव स्मिता लोणकर आदी उपस्थित होते.