व्यावसायिकास निर्जनस्थळी नेऊन लुटले

पुणे, ता. ७ : फर्निचरचे काम करण्याच्या बहाण्याने व्यावसायिकास बोलावून त्यास निर्जनस्थळी नेत चोरट्यांनी त्याच्याकडून जबरदस्तीने रोख रक्कम, मोबाईल जबरदस्तीने काढून घेतला. त्याचबरोबर फोन पे द्वारे त्यांच्या खात्यातील काही रक्कमही जबरदस्तीने पाठविण्यास भाग पाडले. ही घटना विमानळ परिसरातील फॉरेस्ट पार्क परिसरात बुधवारी रात्री साडे नऊ वाजण्याच्या सुमारास घडली. चोरट्यांनी व्यावसायिकाच्या खिशातील ५ हजार रुपये, मोबाईल, सोन्याची बाळी काढून घेतली. त्याचबरोबर फोन पेचा वापर करून खात्यातून ४२ हजार ८०० रुपये आरोपींनी स्वतःच्या बॅंक खात्यात जमा केले. असे एकूण ६१ हजार ८०० रुपयांचा ऐवज जबरदस्तीने लुटला.
याप्रकरणी अमराराम चौधरी (वय ३२, रा. वडगाव शेरी) यांनी विमानतळ पोलिस ठाण्यात फिर्याद दिली आहे. त्यावरुन दोघांविरुद्ध चोरीचा गुन्हा दाखल करण्यात आला आहे.
फिर्यादीच्या मोबाईलवर अनोळखी व्यक्तीने बुधवारी संपर्क साधला. त्याने "आपल्याला फर्निचरचे काम करायचे आहे'' असे सांगून, रात्री साडे नऊ वाजण्याच्या सुमारास फॉरेस्ट पार्क रस्त्यावरील म्हशीच्या गोठ्याजवळ बोलावून घेतले. त्यानंतर अंधाराचा फायदा घेऊन दोघांनी फिर्यादीस पकडून निर्जनस्थळी नेले व लुटले.