उन्हाच्या झळांपासून पुणेकरांना दिलासा

पुणे, ता. २४ ः पुणे शहर आणि परिसरात गेल्या तीन दिवसांपासून ढगाळ वातावरण कायम आहे. तर अधून-मधून उन्हाचे ही दर्शन होत आहेत. असे असले तरी उन्हाचा कडाका कमी झाल्याने पुणेकरांना मात्र दिलासा मिळत आहे. पुढील पाच दिवस ही स्थिती अशीच कायम राहण्याची शक्यता हवामानशास्त्र विभागाने वर्तवली आहे.
शहरात रविवारी ३७.१ अंश सेल्सिअस कमाल तर २५.३ अंश सेल्सिअस किमान तापमानाची नोंद झाली. मार्च आणि एप्रिलच्या सुरवातीपासून शहरात उन्हाचा कडाका वाढला होता. कमाल तापमान ४० अंशांपर्यंत ही पोचल्याच्या नोंदी झाल्या. त्यामुळे उन्हाच्या झळांमुळे अंगाची लाही-लाही होत होती. त्यात किमान तापमानात ही हळू-हळू वाढ झाल्याने उकाडा ही अधिक जाणवू लागला होता. मात्र एप्रिलच्या तिसऱ्या आठवड्यात आता अवकाळी पावसाच्या परिस्थितीमुळे जिल्ह्यात काही ठिकाणी वादळी वारे, मेघगर्जना तर काही ठिकाणी विजांच्या कडकडाटासह पाऊस देखील पडला. त्यामुळे कमाल तापमान हे सरासरीपेक्षा कमी नोंदले जात आहे. परिणामी नागरिकांची उन्हापासून थोडी सुटका झाली आहे. परंतु ढगाळ वातावरणामुळे किमान तापमानात सरासरीपेक्षा ४ ते ५ अंशांनी वाढ झाल्याने उकाडा अद्याप कायम आहे. हवामानशास्त्र विभागाने दिलेल्या माहितीनुसार येत्या शुक्रवारपर्यंत (ता. २९) शहर आणि परिसरात ढगाळ वातावरण राहणार असून एकाद-दुसऱ्या दिवशी हलक्या स्वरूपाच्या पावसाची शक्यता आहे.