शहराच्या वेगवेगळ्या भागात घरफोड्यांच्या घटना शहराच्या वेगवेगळ्या भागात घरफोड्यांच्या घटना

पुणे, ता. ४ ः लोहगाव व सिंहगड रस्ता परिसरामध्ये घरांचे कुलूप तोडून चोरट्यांनी घरातून तेरा लाख रुपयांचा ऐवज चोरुन नेला. या प्रकरणी विमानतळ व सिंहगड रस्ता पोलिस ठाण्यात गुन्हा दाखल करण्यात आला आहे.

ेलोहगाव येथे झालेल्या चोरीप्रकरणी आकाश खांदवे (वय २८) यांनी फिर्याद दिली आहे. त्यावरुन विमानतळ पोलिस ठाण्यात गुन्हा दाखल करण्यात आला आहे. फिर्यादीचे लोहगाव-वाघोली रस्त्यावरील दादाचीवस्ती येथे घर आहे. रविवारी त्यांचे घर बंद होते. दरम्यान, रविवारी मध्यरात्री चोरट्यांनी त्यांच्या घराचे कुलूप तोडून घरामध्ये प्रवेश केला. त्यानंतर चोरट्यांनी घरातील तीन बेडरुममध्ये असलेल्या कपाटातील ८ लाख ७९ हजार ५०० रुपये किमतीचे सोन्याचे दागिने चोरुन नेले. या प्रकरणाचा तपास पोलिस उपनिरीक्षक सचिन जाधव करीत आहेत.

नऱ्हे येथील चोरीप्रकरणी ३५ वर्षीय महिलेने सिंहगड रस्ता पोलिस ठाण्यात फिर्याद दिली आहे. फिर्यादी महिलेची नऱ्हे-धायरी रस्त्यावरील एका सोसायटीमध्ये सदनिका आहे. रविवारी मध्यरात्रीच्या सुमारास त्यांच्या सदनिकेचे कुलूप बनावट चावीने उघडून चोरट्यांनी कपाटातील तीन लाख ९० हजार रुपयांचे सोन्याचे दागिने व ४५ हजार रुपयांची रोख रक्कम असा ४ लाख ३५ हजार रुपये किमतीचा ऐवज चोरुन नेला.