नायगावकरांना मिळणार अतिरिक्त पाणी

नायगावकरांना मिळणार अतिरिक्त पाणी

वसई, ता. १७ (बातमीदार) ः वसई-विरार महापालिकेच्या अखत्यारीत येणाऱ्या नायगाव शहराला कमी प्रमाणात पाणीपुरवठा होत आहे. त्यामुळे शहराला होणाऱ्या पाणीपुरवठ्यात वाढ करण्याची तसेच २०० मिमीची जलवाहिनी अंथरण्याची मागणी करण्यात येत होती. अखेर या मागणीला यश आले असून २०० मिमी व्यासाची नवीन जलवाहिनी अंथरण्यात येत आहे. हे काम अंतिम टप्प्यात आले असून त्यामुळे नायगाववासीयांना अतिरिक्त पाणीपुरवठा होणार आहे.
नायगाव परिसरात झपाट्याने लोकवस्ती वाढत आहे. वाढलेल्या लोकसंख्येला पुरेसा पाणीपुरवठा होत नाही. येथे नवीन नळजोडणी धारकदेखील अधिक आहेत. अशातच महाराष्ट्र जीवन प्राधिकरणाने या विभागासाठी अंथरलेल्या ३०० मिमी व्यासाच्या पाईपलाईनमधून पाणीपुरवठा केला जात आहे; मात्र जुन्या जीर्ण जलवाहिन्या, नेहमी होणारी गळती, अनियमित व कमी दाबाने पाणीपुरवठा यामुळे नागरिकांना पुरेसे पाणी मिळत नाही.
नायगाव पूर्वेकडील जूचंद्र, बापाणे, परेरानगर तसेच महापालिका हद्दीत येणाऱ्या गावांना पिण्याच्या पाण्याची समस्या उद्‍भवत असते. त्यामुळे पाणी समस्येबाबत नाराजी व्यक्त केली जात आहे. याप्रश्नी महापालिकेने लवकरात लवकर लक्ष घालावे, अशी मागणी ग्रामस्थांनी लावून धरल्यावर यासंदर्भात आमदार हितेंद्र ठाकूर यांच्या मार्गदर्शनाखाली माजी सभापती कन्हैया भोईर यांनी वसई-विरार महापालिकेकडे अतिरिक्त पाणीपुरवठा व्हावा याकरिता नवीन जलवाहिनी अंथरण्यासाठी पाठपुरावा केला.
पार्इपलार्इनला वसई पूर्व रेंज ऑफिस ते भोयदापाडा येथे जोडणी करण्याचे काम प्रगतिपथावर आहे; तर रेल्वे फाटक ते टिवरी या भागात जलवाहिनी टाकण्यात येणार आहे. रस्ते खोदण्यासाठी वाहतूक पोलिसांची परवानगी घेण्यात आली आहे. हे काम पूर्ण झाल्यावर जलवाहिनीची तपासणी करण्यात येणार आहे. त्यानंतर पाणीपुरवठा सुरू करण्यात येणार असल्याने नायगाव शहरातील व ग्रामीण भागातील नागरिकांना दिलासा मिळणार आहे.

नवीन जलवाहिनीसाठी महापालिकेने काम सुरू केले आहे. त्यामुळे वाढीव पाणी नायगाव शहराला मिळेल. पाण्यासाठी सातत्याने केलेल्या पाठपुराव्याला यश आले आहे.
- कन्हय्या भोईर, माजी सभापती

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com