‘प्रभातकालीन मैफिलीतून नावीन्यपूर्ण अनुभव’

पुणे, ता. ८ ः ‘‘गायन-वादनाच्या मैफली बहुतांश सायंकाळीच होतात. त्यामुळे ठराविक रागांचे सादरीकरण होत असते. परंतु प्रभातकालीन रागांच्या सुरावटी या आध्यात्मिक आणि भक्तिपूर्ण वातावरणाची निर्मिती करणाऱ्या आणि नवीन अनुभव देणाऱ्या असतात. श्रोता रसिक असेल तर त्यालाही अशा प्रभातकालीन मैफलीतून काहीतरी नवीन गवसते’’, असे मत संतूरवादक पं. सतीश व्यास यांनी व्यक्त केले.
‘प्रभातस्वर’ ही प्रभातकालीन रागांची मैफल उद्या (ता. १०) सकाळी ६.३० वाजता डेक्कन जिमखान्यावरील गोखले इन्स्टिट्यूटच्या आवारातील ज्ञानवृक्षाखालील मोकळ्या जागेत होणार आहे. या मैफलीनिमित्त त्यांनी संवाद साधला. ‘‘बऱ्याच कालखंडानंतर पुण्यात सादरीकरणाची संधी मिळत आहे. निसर्गाच्या सान्निध्यात, मोकळ्या वातावरणात मैफल आयोजित केली असल्याने मीही सादरीकरणास उत्सुक आहे. पुण्यातील रसिक चोखंदळ आहेत, मोठ्या संख्येने कार्यक्रमांना हजेरी लावतात त्यामुळे चांगला माहोल तयार होतो’’, असेही त्यांनी यावेळी सांगितले.