पसुरेत जमिनीच्या हद्दीच्या वादातून फायरींग

भोर, ता. १५ : भाटघर धरण खोऱ्यातील पसुरे (ता. भोर) येथे जमिनीच्या हद्दीच्या वादातून हॉटेल व्यावसायिक ब्रिगेडियर (निवृत्त) यांनी बंदुकीतून दोन राउंड फायर करत स्थानिक रहिवाशांमध्ये दहशत निर्माण करण्याचा प्रयत्न केला. ही घटना बुधवारी (ता. १५) दुपारी अडीचच्या सुमारास घडली. रात्री उशिरापर्यंत भोर पोलिस ठाण्यात गुन्हा दाखल करण्याचे काम सुरू होते.
स्थानिक रहिवाशांनी दिलेल्या माहितीनुसार, ब्रिगेडियर हितेशपाल सिंग (निवृत्त) यांनी आपल्या कुंजवन रिसॉर्टला वीजपुरवठा करण्यासाठी स्थानिक शेतकऱ्यांच्या जमिनीत अनधिकृतपणे खांब उभे केले. याचा जाब विचारण्यासाठी पसुरे व कर्नवडीतील शेतकरी सिंग यांच्याकडे गेले. त्यात पसुरेच्या बिऱ्हामणेवाडीतील अशोक बिऱ्हामणे, प्रकाश शेलार, शंकर बिऱ्हामणे, सोनबा बिऱ्हामणे, चंद्रकांत कुरुंगावडे व कर्नवडीतील श्री पवार आदींचा समावेश आहे. शेतकरी व सिंग यांच्यामध्ये वाद झाला. त्यावेळी सिंग यांनी बंदुकीतून दोन राउंड हवेत फायर केले. त्यामुळे ग्रामस्थ व शेतकरी भयभीत झाले. ग्रामस्थांनी सिंग यांचा व्हिडिओ काढून सोशल मीडियावर व्हायरल केला.
घटनेची माहिती मिळताच भोर पोलिस ठाण्याचे निरीक्षक अण्णासाहेब पवार व उपनिरीक्षक अशोक खुटवड घटनास्थळी दाखल झाले. त्यांनी स्थानिकांची समजून काढत सिंग यांना ताब्यात घेतले.
दरम्यान आचारसंहितेमुळे पोलिसांनी सर्व परवानाधारकांकडून शस्त्रे जमा केली. मात्र सिंग यांच्याकडे बंदूक कशी? असा प्रश्न रहिवाशांनी उपस्थित केला. त्यावर पोलिस चौकशी करत आहेत.

‘‘हितेशपाल सिंग यांना ताब्यात घेतले असून त्यांच्याकडील बंदुकीची चौकशी सुरू आहे.’’
- अण्णासाहेब पवार, पोलिस निरीक्षक, भोर पोलिस ठाणे