पुण्यात तीन नव्या महापालिकांची गरज उपमुख्यमंत्री पवार यांचे मत ः चाकणमधील वाहतूक प्रश्‍नाबाबत पाहणी

चाकण, ता. ८ ः चाकण औद्योगिक वसाहत व चाकण परिसरात मोठ्या प्रमाणात वाहतूक कोंडी होत आहे. रस्त्यांची दुरवस्था आहे. परिसराचा विकास होण्यासाठी व मोठ्या प्रमाणात केंद्र सरकारच्या योजना व विविध योजनांचा निधी उपलब्ध होण्यासाठी चाकण परिसर, हिंजवडी परिसर, उरुळी, मांजरी, फुरसुंगी या परिसरातही महापालिका होणे गरजेचे आहे. पुणे परिसरात तीन नव्या महापालिकांची खरी गरज आहे, असे मत उपमुख्यमंत्री अजित पवार यांनी व्यक्त केले.
चाकण (ता. खेड) येथील वाहतूक कोंडीच्या समस्येची पाहणी तसेच रस्त्यांची पाहणी करण्यासाठी उपमुख्यमंत्री पवार यांनी चाकण येथे आज सकाळी दौरा केला. यात त्यांनी रस्त्यावर उतरून वाहतूक कोंडीची समस्या पाहिली तसेच रस्त्याची दुरवस्था पाहिली. रस्त्यावरील इतर प्रलंबित कामांची पाहणी केली.
विभागीय आयुक्त डॉ. चंद्रकांत पुलकुंडवार, जिल्हाधिकारी जितेंद्र डुडी, ‘पीएमआरडीए’चे आयुक्त योगेश म्हसे, पिंपरी-चिंचवडचे पोलिस आयुक्त विनयकुमार चोबे, ‘एमआयडीसी’चे अधिकारी, राष्ट्रीय राजमार्ग प्राधिकरणचे अधिकारी तसेच संबंधित विभागाचे सर्व अधिकारी यांच्याशी चर्चा केली.
पवार म्हणाले, ‘‘पुणे- नाशिक महामार्ग, चाकण- तळेगाव, चाकण- शिक्रापूर मार्ग या मार्गावर सांडपाणी वाहून नेण्याची तसेच पावसाचे पाणी वाहून नेण्याची कोणतीही व्यवस्था नाही. त्यामुळे मार्गावर पाणी साचते. हे प्रश्न संबंधित विभाग नगर परिषदा सोडवू शकत नाही. या भागात औद्योगीकरणामुळे मोठ्या प्रमाणात लोकसंख्या वाढलेली आहे. पाच लाख लोकसंख्येला महापालिका होते. दररोज सुमारे एक लाखांवर वाहनांची ये-जा असते. त्यामुळे पुण्यात चाकण परिसर, हिंजवडी परिसर, उरुळी, मांजरी, फुरसुंगी परिसरात नव्याने महापालिकांची खरी गरज आहे त्यामुळे नागरिकांचे प्रश्न सुटतील. अंतर्गत समस्या सुटतील.’’
तीन महापालिका करण्याबाबतचा निर्णय काही लोकांना आवडतील न आवडतील पण हे काळाच्या दृष्टीने करावे लागणार आहे. त्यामुळे केंद्राचा निधी व विविध योजनांचा निधी मोठ्या प्रमाणात येतो. त्यामुळे कामे होतात. छोट्या नगर परिषदाकडून तसेच स्थानिक संस्थांकडून मोठी कामे शक्य नाही. त्यामुळे समस्या वाढत आहेत, असेही पवार यांनी नमूद केले.
----------------------------------