राजकुमार गोयल देशाचे नवे मुख्य माहिती आयुक्त

सकाळ न्यूज नेटवर्क
नवी दिल्ली, ता.१५ ः माजी सनदी अधिकारी राजकुमार गोयल यांनी सोमवारी देशाचे मुख्य माहिती आयुक्तपद म्हणून कार्यभार हाती घेतला.
राष्ट्रपती द्रौपदी मुर्मू यांनी त्यांना एका कार्यक्रमात पद आणि गोपनीयतेची शपथ दिली. पंतप्रधान नरेंद्र मोदी यांच्या अध्यक्षतेखाली अलीकडेच झालेल्या बैठकीत गोयल यांच्या निवडीवर शिक्कामोर्तब करण्यात आले होते. लोकसभेतील विरोधी पक्षनेते राहुल गांधी यांनी त्या बैठकीत गोयल यांच्या नियुक्तीला असहमती दर्शवली होती. गोयल हे १९८७ च्या तुकडीचे माजी आयएएस अधिकारी आहेत. मुख्य माहिती आयुक्त म्हणून काम करण्यासाठी त्यांना तीन वर्षांचा कालावधी मिळणार आहे.
माहिती अधिकार कायद्यानुसार (आरटीआय) सरकारला मुख्य माहिती आयुक्ताची नेमणूक करावी लागते. गोयल यांनी गृह मंत्रालयात सचिव (सीमा व्यवस्थापन) पदाचा कार्यभार सांभाळला आहे. याशिवाय केंद्र आणि जम्मू काश्मीरमध्ये त्यांनी अनेक महत्त्वाच्या पदांवर काम केले आहे. त्यांच्या शपथविधीच्या कार्यक्रमास उपराष्ट्रपती सी. पी. राधाकृष्णन, कार्मिक खात्याचे मंत्री जितेंद्र सिंह आदी उपस्थित होते.