काँग्रेस हा पक्ष देशाचा आत्मा आहे

काँग्रेस हा पक्ष देशाचा आत्मा आहे

राहुल गांधी ः वंचितांबरोबर उभे राहण्याचे आश्‍वासन

सकाळ न्यूज नेटवर्क
नवी दिल्ली, ता. २८ ः ‘‘काँग्रेस हा केवळ राजकीय पक्ष नाही तर तो देशाचा आत्मा आहे,’’ असे प्रतिपादन काँग्रेसचे नेते राहुल गांधी यांनी पक्षाच्या १४० व्या स्थापना दिवसाचे औचित्य साधत रविवारी समाज माध्यमातून केले. स्थापना दिनानिमित्त गांधी यांनी पक्षाच्या नेत्या-कार्यकर्त्यांना शुभेच्छा दिल्या आहेत.
‘‘ज्या लोकांनी आपल्या बलिदानातून देशाला स्वातंत्र्य दिले, राज्यघटनेचा पाया रचला आणि लोकशाही, धर्मनिरपेक्षता, सामाजिक न्याय तसेच समानतेच्या मूल्यांना मजबूत केले, अशा थोरांना तसेच देशाच्या ऐतिहासिक वारशाला मी नमन करतो. काँग्रेस हा केवळ एक राजकीय पक्ष नाही तर तो भारताचा आत्मा आहे. प्रत्येक कमजोर, प्रत्येक वंचित आणि प्रत्येक कष्टकरी लोकांसोबत आमचा पक्ष उभा आहे. तिरस्कार, अन्याय आणि हुकूमशाहीच्या विरोधात सत्य, साहस आणि घटनेच्या रक्षणाची लढाई जास्त मजबुतीने लढत राहू,’’ असे गांधी यांनी संदेशात म्हटले आहे.