फुरसुंगीत जलपर्णी वाढल्याने साथीच्या आजारांना निमंत्रण

फुरसुंगी, ता. ६ : नाल्यांमध्ये जलपर्णी वाढल्याने फुरसुंगीतील नालेसफाईच्या प्रश्नाने पुन्हा एकदा डोके वर काढले आहे. येथील नाल्यांमधील जलपर्णी काढून वाहणाऱ्या पाण्याचा अडथळा दूर करावा, अशी मागणी नागरिकांकडून होत आहे.
येथील स्मशानभूमीलगत असणाऱ्या नाल्यामध्ये जलपर्णीचे प्रमाण दिवसेंदिवस वाढत आहे. नाल्यात उगवलेल्या वनस्पतीमुळे पाणी वाहून जाण्यास अडथळा निर्माण होतो. गावातील ओढ्यांमधून सांडपाणी वाहत आहे. पुढील बाजूस पाणी वाहून जाण्यास अडथळा होत असल्याने मागील बाजूस घाण पाणी साठून राहते. त्यामुळे नाल्यातून दुर्गंधी पसरत आहे. पाणी साठून राहिल्याने डास आणि माश्यांचे प्रमाण वाढत आहे. जवळच स्मशानभूमी आहे. नागरिक या ठिकाणी अंत्यविधीसाठी येत असतात. अशा वेळेस ते तासन््तास बसत असतात. त्यांना येथून येणाऱ्या दुर्गंधीचा त्रास जाणवत आहे. डासांमुळे साथीच्या आजारांची भीती वाढत असल्याने येथील जलपर्णी काढून पाण्याचा अडथळा दूर करावा, असे येथील स्थानिक नागरिक जीवन कामठे, गणेश कामठे, आकाश पवार यांनी सांगितले.
नागरिक संतोष हरपळे म्हणाले, ‘‘महापालिकेची नालेसफाई केवळ दिखावू आहे. केवळ दर्शनी भागाची सफाई केली जात आहे. संपूर्ण नाल्याची सफाई करून मोहीम सातत्याने राबवणे आवश्यक आहे. औषध फवारणीने निर्जंतुकीकरण करणे गरजेचे आहे. अन्यथा संपूर्ण गावाला साथीच्या रोगाला सामोरे जावे लागेल. महापालिका कर्मचाऱ्यांवर अंकुश राहिला नाही. फोनदेखील उचलत नाहीत.’’
दरम्यान, नालेसफाई विभागाचे अभियंता प्रकाश पाटील यांच्याशी संपर्क साधला, मात्र तो होऊ न शकल्याने माहिती मिळू शकली नाही.

फुरसुंगी : परिसरातील नाल्यांमध्ये जलपर्णीचे प्रमाण वाढले आहे.