वाहतूक थांबविल्याने दिवेघाटात वाद

फुरसुंगी, ता. ८ : पालखी महामार्गावरील दिवेघाट दरम्यान वडकी ग्रामस्थ, प्रवासी आणि कंत्राटदार यांच्यामध्ये जास्त काळ वाहतूक थांबविल्याने मंगळवारी वाद झाल्याचा प्रकार घडला. पोलिसांनी मध्यस्थी केल्याने हा वाद मिटला.

पालखी सोहळ्यानिमित्त येथील दिवेघाट दरम्यान सुरू असलेले पालखी महामार्गाचे काम थांबविण्यात आले होते. पालखी सोहळा संपल्याने ते पुन्हा सुरू करण्यात आले आहे. येथील डोंगर फोडण्यासाठी करण्यात येणाऱ्या स्फोटासाठी सुरक्षतेतच्या कारणास्तव रस्ता बंद करण्यात येतो, मात्र जास्त काळ रस्ता बंद केल्याने येथील ग्रामस्थ संतापले आणि वादाची ठिणगी पडली.

सासवडकडून वडकीकडे येताना घाटाच्या वरच्या बाजूस मंदिराजवळ ब्लास्टिंगमुळे आकाराने मोठा दगड मार्गावर आला होता. तो दगड तीन ब्रेकर लावून फोडण्यात आला, मात्र दगड मोठा असल्याने तो फोडून बाजूला करण्यासाठी वेळ लागला. त्यामुळे वाहतूक काही काळ थांबवावी लागली, असे येथील व्यवस्थापक श्रीवास्तव यांनी सांगितले.

ब्लास्टिंगचे कारण पुढे करत येथील आरएमसी प्लांटच्या गाड्यासाठी वाहतूक बंद करण्यात येते, अशी माहिती मिळाल्याने येथील ग्रामस्थ पंडित मोडक यांच्यासह स्थानिक रहिवासी शहानिशा करण्यासाठी येथील कार्यालयात गेले होते, परंतु येथील व्यवस्थापक भीतीमुळे समोर आलेच नाही. यामध्ये नेमके काय झाले हे कोणालाच समजले नाही आणि बघ्यांची गर्दी वाढली.

फुरसुंगी पोलिस ठाण्याचे वरिष्ठ पोलिस निरीक्षक अमोल मोरे यांनी दोन्ही बाजू समजावून घेऊन ग्रामस्थ आणि राष्ट्रीय महामार्ग कर्मचारी यांच्यात झालेले गैरसमज दूर करत वाद मिटवला आणि वाहतूक सुरळीत केली.