महापालिका शिक्षण विभागाकडून शिक्षक भरतीसाठी जाहिरात प्रसिद्ध

सकाळ इम्पॅक्ट

उंड्री, ता. २३ : ‘सकाळ’ने केलेल्या बातमीची दखल घेऊन महापालिकेकडून शिक्षक भरती करण्यात येत आहे. यामुळे विद्यार्थ्यांना शिक्षक मिळणार असून त्यांचे शैक्षणिक नुकसान टळणार आहे.
‘सकाळ’ने ‘विद्येच्या माहेरघरात पालिका शाळा नापास’ या शीर्षकाच्या वृत्ताची मालिका प्रसिद्ध केली होती. या बातमीद्वारे पालिकेच्या नव्याने समाविष्ट शाळांसह इतर शाळांचे स्वतः जाऊन परीक्षण करण्यात आले होते. पटसंख्या, शिक्षक संख्या, मुख्याध्यापक, शिपाई, रखवालदार, भौतिक सुविधा हे मुद्दे डोळ्यासमोर ठेवून माहितीचे संकलन केले होते. दरम्यान कमी शिक्षक, मुख्याध्यापक, शिपाई, रखवालदार नाहीत अशी माहिती निदर्शनास आली. तसेच शाळेत विद्यार्थीसंख्या समाधानकारक असताना शिक्षक नसल्याने विद्यार्थ्यांचे होणारे नुकसान आणि इतर शिक्षकांवर येणारा कामाचा ताण वाढत असल्याचे निदर्शनास आले. एक वर्षापासून अशा परिस्थितीत सुरू असलेल्या शाळांची स्थिती सविस्तरपणे बातमीद्वारे प्रशासनासमोर मांडण्यात आली होती.
याची गांभीर्याने दखल घेत महापालिकेचे आयुक्त नवलकिशोर राम यांच्याकडून शिक्षण विभागाला तत्काळ शिक्षक भरती करण्याचे आदेश दिले होते. त्यानुसार शिक्षण विभागाकडून मराठी माध्यम, इंग्रजी माध्यम आणि विशेष मुलांच्या शाळांमध्ये कमी असलेल्या शिक्षकांसाठी भरतीची जाहिरात प्रसिद्ध केली आहे. यामध्ये विशेष मुलांच्या शाळेसाठी तीन, मराठी माध्यमासाठी १९१, इंग्रजी माध्यमासाठी ६२ शिक्षक कंत्राटी पद्धतीने भरती करण्यात येणार आहेत.
या पाठपुराव्यामुळे एक वर्षापासून रखडलेली भरती प्रक्रिया सुरु झाली. यामुळे पालक व नागरिकांकडून ‘सकाळ’चे आभार व्यक्त होत आहेत.

‘सकाळ’ ने या प्रश्‍नाला वाचा फोडून मुलांचे होणारे शैक्षणिक नुकसान रोखले आहे. समाविष्ट गावातील शाळांना याचा फायदा होणार आहे. कमी शिक्षक संख्येमुळे पालिकेच्या शाळेकडे पाठ फिरवलेले पालक देखील पुन्हा शाळेकडे परतणार आहेत.
- दीपाली कवडे, स्थानिक, हांडेवाडी

‘सकाळ’ने वास्तव आयुक्तांपुढे मांडल्याने शाळांना आवश्यक शिक्षक मिळणार आहेत. ‘सकाळ’ ने केलेली मदत मराठी शाळा टिकण्यासाठी महत्त्वाची ठरणार आहे.
- सचिन पुणेकर, स्थानिक, उंड्री