ब्रिजभूषण सिंह यांच्या निषेधात जोडे मारो आंदोलन

पुणे, ता. ६ : भाजपचे खासदार ब्रिजभूषण शरण सिंह यांच्याविरोधात कुस्तीपटूंनी लैंगिक छळाचे गुन्हे दाखल केले आहेत. ब्रिजभूषण सिंह यांच्यावर लवकरात लवकर कारवाई करण्यात यावी, अशी मागणी करत पुण्यातील वंदेमातरम् संघटनेतर्फे करण्यात आली. या वेळी त्यांच्या प्रतिमेला काळे फासून, जोडे मारो आंदोलन करण्यात आले.

वंदेमातरम् संघटनेच्या वतीने मंगळवारी बालगंधर्व चौकात, भारतीय महिला कुस्तीपटू यांच्या समर्थनात खासदार ब्रिजभुषण यांच्या निषेधार्थ आंदोलन करण्यात आले. या वेळी ब्रिजभूषण यांच्या प्रतिमेला काळे फासून, जोडे मारून जाहीर निषेध करण्यात आला. पंतप्रधान नरेंद्र मोदी, गृहमंत्री अमित शहा यांनी ब्रिजभूषण यांची पक्षातून हकालपट्टी करावी, राष्ट्रीय कुस्ती महासंघाचे राष्ट्रीय अध्यक्षपद काढून घ्यावे, त्यांच्यावर दाखल केलेल्या गुन्ह्याची निष्पक्ष चौकशी करावी, सत्तेचा गैरवापर करून कुस्तीपटूंवर दबाव आणला जातोय, अशा गुंड प्रवृत्तीच्या माणसावर कारवाई केली नाही तर भविष्यात आंदोलन तीव्र केले जाईल, असा इशारा वंदेमातरम् संघटनेतर्फे प्रदेश कार्याध्यक्ष सचिन जामगे यांनी दिला. या वेळी महेश बाटले, मोहित काकडे, अमोल जगताप, अश्रू खवळे, संचित कर्वे, विनोद मोहिते, महानंदा राजघाटे, गोदाबाई ताकतोडे, वैशाली रणदिवे, सुकन्या जानराव, पुनम दास, संघटनेच्या महिला कार्यकर्त्या, पदाधिकारी उपस्थित होते.