सिंहगड रस्त्यावरील उड्डाणपुलाच्या नामकरणाची मागणी

आंबेगाव, ता. ८ : सिंहगड रस्त्यावरील नवीन उड्डाणपुलाचे ‘प्रति पंढरपूर विठ्ठल रुक्मिणी उड्डाणपूल’ असे नामकरण करण्याची मागणी डॉ. बाबासाहेब आंबेडकर समिती आणि संभाजीराजे गोसावी प्रतिष्ठानच्यावतीने पालकमंत्री तथा उपमुख्यमंत्री अजित पवार आणि सामाजिक न्याय राज्यमंत्री माधुरी मिसाळ यांना निवेदनाद्वारे करण्यात आली.
सिंहगड रस्त्यावरील नवीन उड्डाणपूल हा ‘प्रति पंढरपूर’ म्हणून ओळख असलेल्या विठ्ठलवाडी जवळ आहे. शिवाय परिसरातील नागरिकांचे श्री विठ्ठल हे उपास्य दैवत आहे. त्यामुळे संबंधित पुलाचे नामकरण ‘प्रति पंढरपूर विठ्ठल रुक्मिणी उड्डाणपूल’ असे करणे उचित ठरेल अशी माहिती डॉ. बाबासाहेब आंबेडकर समितीचे संस्थापक-अध्यक्ष शशिकांत कांबळे यांनी दिली. यावेळी माजी नगरसेविका ज्योती गोसावी, केतन गोसावी, अभिजित देशपांडे, मयूर पडलवार आदी उपस्थित होते.