कला केंद्रात गोळीबार करणाऱ्यांवर गुन्हा

केडगाव, ता. २३ : वाखारी (ता. दौंड) येथील न्यू अंबिका कला केंद्रात हवेत गोळीबार करून दहशत निर्माण करणाऱ्या चौघांवर यवत पोलिसांना गुन्हा दाखल केला आहे. या गोळीबारात कोणीही जखमी नाही, अशी माहिती अतिरिक्त पोलिस अधीक्षक गणेश बिरादार यांनी बुधवारी दिली. दरम्यान, राजकीय पदाधिकाऱ्यांशी संबंधित नातेवाईकाने हा प्रकार केल्याच्या चर्चेने जिल्ह्यात खळबळ उडाली आहे.
या संदर्भात अंबिका कला केंद्राचे व्यवस्थापक बाबा अंधारे (रा. वाखारी) यांनी फिर्याद दिली आहे. त्यानुसार पोलिसांनी बाबासाहेब मांडेकर, चंद्रकांत मारणे, गणपत जगताप आणि अन्य एका अनोळखी व्यक्तीवर गुन्हा दाखल केला आहे. संशयित आरोपींचे पूर्ण नाव व पत्ता शोधून काढणे, आरोपींची पार्श्वभूमी तपासणे, आरोपी राजकीय पदाधिकाऱ्यांशी संबंधित आहेत का, गोळीबार करण्याचा उद्देश काय होता? या बाबी तपासात समोर येतील, असे पोलिसांनी सांगितले. आरोपींवर शांतता भंग करणे व शस्त्र कायद्यानुसार गुन्हे दाखल केले आहेत.
बिरादार म्हणाले, ‘‘वाखारीतील अंबिका कला केंद्रात सोमवारी मध्यरात्री गोळीबार झाला. मात्र याबाबत फिर्याद द्यायला कोणी पुढे आले नाही. समाज माध्यमावर एका कला केंद्रात गोळीबार झाल्याची चर्चा सुरू होती. पोलिसांनी दौंड तालुक्यातील वाखारी, चौफुला, देऊळगाव गाडा येथील कला केंद्रात कसून चौकशी केली. मात्र, प्रत्येक कला केंद्राच्या व्यवस्थापनाने हा प्रकार आमच्याकडे घडला नसल्याचे सांगितले. त्यामुळे पोलिस संभ्रमात होते. आज वाखारीतील अंबिका कला केंद्रातील कामगारांना पोलिसांनी विश्वासात घेतल्यानंतर बाबा अंधारे यांनी गोळीबाराचा प्रकार केल्याची माहिती दिली. त्यांच्या फिर्यादीनुसार गुन्हा दाखल केला आहे.’’

हे प्रकरण राजकीय दबावाखाली असल्याचा आरोप पोलिसांनी फेटाळला आहे. एका आमदाराच्या भावाने हा गोळीबार केल्याची चर्चा झाल्याने जिल्ह्यात खळबळ उडाली. आमदार रोहित पवार यांनी याबाबत ट्विट केल्यानंतर तपासाला गती आली. पोलिसांनी तीनही कला केंद्रातील सीसीटिव्ही ताब्यात घेतले आहेत.