ईडीने संलग्न केलेल्या मालमत्तेची परस्पर विक्री

कुरुळी, ता. १३ : सक्तवसुली संचालनालयाने (ईडी) मनी लाँड्रिंग प्रतिबंधक कायद्यांतर्गत संलग्न केलेली मालमत्ता एका महिलेने शासन आदेश धाब्यावर बसवून परस्पर विकल्याचा प्रकार उघडकीस आला आहे. चार कोटी ८४ लाख ३८ हजारांचा हा बेकायदेशीर व्यवहार झाल्याचे समोर आले असून, या प्रकरणी संबंधित महिलेवर महाळुंगे एमआयडीसी पोलिस ठाण्यात गुन्हा दाखल करण्यात आला आहे.
हा प्रकार खेड तालुक्यातील निघोजे गावच्या हद्दीत घडला. याबाबत ईडीच्या सहायक निदेशकांनी दिलेल्या तक्रारीनुसार, बीड जिल्ह्यातील ४४ वर्षीय महिलेने शासनाच्या आदेशाचे उल्लंघन केले आहे. पोलिसांनी दिलेल्या माहितीनुसार, निघोजे येथील एक भूखंड ईडीने संलग्न केला होता. संबंधित महिलेला याबाबत लेखी नोटीसद्वारे स्पष्टपणे माहिती देण्यात आली होती. तरीदेखील महिलेने या मालमत्तेची विक्री केली. यासाठी खेड येथील सहनिबंधक कार्यालयात विक्री करारनामा करण्यात आला असून, व्यवहाराची रक्कम चार कोटी ८४ लाख ३८ हजार रुपये इतकी आहे. या प्रकरणाचा पुढील तपास महाळुंगे एमआयडीसी पोलिस करीत आहेत.