शासकीय महिला कर्मचाऱ्यांकडून रक्कम वसूल करू ः तटकरे मुख्यमंत्री लाडकी बहीण योजना

मंचर, ता. ३१ : ‘‘आर्थिकदृष्ट्या दुर्बल महिलांसाठी सुरु करण्यात आलेल्या ‘मुख्यमंत्री लाडकी बहीण’ योजनेचा लाभ काही शासकीय महिला कर्मचाऱ्यांनी घेतल्याचा प्रकार समोर आला आहे. या प्रकरणी तपास सुरू असून, दोषी कर्मचाऱ्यांकडून रक्कम वसूल करून शासकीय कोषागृहात भरली जाईल, तसेच त्यांच्यावर प्रशासकीय कारवाई होईल,’’ असा इशारा महिला व बालकल्याण मंत्री आदिती तटकरे यांनी दिला आहे.
मंचर (ता. आंबेगाव) येथे गुरुवारी (ता. ३१) राष्ट्रवादी कॉंग्रेसतर्फे आयोजित महिला मेळाव्यात तटकरे बोलत होत्या. अध्यक्षस्थानी माजी गृहमंत्री दिलीप वळसे पाटील होते. यावेळी ‘म्हाडा’चे अध्यक्ष शिवाजीराव आढळराव पाटील, अनुसया महिला उन्नती केंद्राच्या अध्यक्षा किरण वळसे पाटील, निर्मला नवले, तृप्ती सरोदे, मोनिका हरगुडे, सुषमा शिंदे, सविता बगाटे, तुलसी भोर, अरुणा थोरात, उषा कानडे, ज्योती निघोट उपस्थित होत्या.
तटकरे म्हणाल्या, ‘‘अजित पवार, सुनील तटकरे, दिलीप वळसे पाटील हे नेते गेली ४० वर्षे अहोरात्र काम करत आहेत. महिलांच्या सक्षमीकरणात त्यांचे मोठे योगदान आहे.’’
वळसे पाटील म्हणाले, ‘‘पुणे जिल्हा मध्यवर्ती बँक महिलांना व्यवसायासाठी दहा लाख रुपयांपर्यंतचे कर्ज साडेचार टक्के व्याज दराने देते. प्रत्येक महिलेचे घरातील योगदान महत्त्वपूर्ण आहे. त्यांना प्रोत्साहन दिले पाहिजे.’’ नीलेश पडवळ यांनी सूत्रसंचालन केले. क्रांती गाढवे यांनी आभार मानले.

‘‘महिलांना समाजकार्यात सक्रिय सहभाग देण्यासाठी तयार करण्यात आलेल्या आदिशक्ती समित्यांचे कार्यक्षेत्र आता तालुका, जिल्हा व राज्यस्तर असे केले जाईल. आदर्श कार्य करणाऱ्या समित्यांचा आढावा घेतला जाईल. विशेष कामगिरी करणाऱ्या समित्यांना प्रमाणपत्र, रोख रक्कम व गौरवचिन्ह देण्यात येणार आहे.’’
- आदिती तटकरे, महिला व बालकल्याण मंत्री.
-------

फोटोः 13764