सुतारदरा परिसरामध्ये कोयता गॅंगचा धुमाकूळ

कोथरूड, ता. १ ः कोथरूडमधील सुतारदरा येथे कोयता गँगने धुमाकूळ घालत नागरिकांमध्ये दहशत पसरवली. गाड्यांची तोडफोड, घरावर दगडफेक, ड्रम व इतर साहित्याची तोडफोड करत आपण येथील भाई असल्याचे आरडाओरडा करत सांगितले. सायंकाळी आठच्या दरम्यान घडलेल्या या घटनेमुळे कोथरूडमध्ये पुन्हा दहशतीचे वातावरण निर्माण झाले. सुतारदरा गल्ली क्रं. २१, २४ क्रांती सेना कमानीचा परिसर या भागात कोयता, धारदार शस्त्राचा धाक दाखवत आलेल्या युवकांनी आरडाओरडा करत दहशत पसरवली व गल्ली बोळातून पळत सुटले. याबाबत कोथरूड पोलिस ठाण्याचे वरिष्ठ पोलिस निरिक्षक संदीप देशमाने यांनी सांगितले की, दोघांना ताब्यात घेतले असून इतरांचा शोध सुरु आहे.