बालगणेश कोथरूड फेस्टिव्हलचा समारोप

कोथरूड, ता. ३१ : ‌‘नाचून नाही, तर वाचून गणेशोत्सव साजरा करा‌’ हे विचार विद्यार्थ्यांमध्ये रुजविण्यासाठी संवाद पुणे आणि वृद्धी रिॲलिटी यांच्या वतीने आयोजित बालगणेश कोथरूड फेस्टिव्हलचा समारोप रविवारी (ता. ३१) झाला. या अंतर्गत विद्यार्थ्यांनी साकारलेल्या पर्यावरणपूरक गणेशमूर्तींचे, गणपतीच्या चित्रांचे प्रदर्शन यशवंतराव चव्हाण कलादालनात भरविले होते.
या फेस्टिव्हल अंतर्गत विद्यार्थ्यांसाठी काव्यवाचन, नाट्यछटा सादरीकरण, कथाकथन, रंगभरण स्पर्धा घेण्यात आल्या. यात पाच हजारांपेक्षा जास्त विद्यार्थ्यांनी सहभाग नोंदविला होता. स्पर्धांची अंतिम फेरी चव्हाण कलादालनात झाली. त्यानंतर बालसाहित्यकार राजीव तांबे, वृद्धी रिॲलिटीचे संचालक अमोल शहा आणि संवाद पुणेचे अध्यक्ष सुनील महाजन यांच्या प्रमुख उपस्थितीत पारितोषिक वितरण झाले. यावेळी अस्तित्व फाउंडेशनच्या अध्यक्षा डॉ. राजश्री जायभाये, प्रज्ञा सातारकर, सुरेश राऊत, सहसंवाद पुणेच्या केतकी महाजन-बोरकर, मुख्याध्यापिका ज्योती मानकर उपस्थित होते.