कोथरूड, शिवाजीनगरमधील पाणी पुरवठा बंद

पुणे, ता. २९ : खडकवासला येथे झालेल्या अपघातामध्ये विजेच्या खांबाचे नुकसान झाल्याने जॅकवेलला होणारा विद्युत पुरवठा खंडित झाला आहे. त्यामुळे शिवाजीनगर, चतु:श्रृंगी, बाणेर आदी भागांतील पाणी पुरवठा बंद झाला आहे.
आज सकाळी सव्वा अकराच्या सुमारास अपघात झाल्यानंतर विद्युत पुरवठा यंत्रणेमध्ये तांत्रिक बिघाड झाल्याने पाणी पुरवठा खंडित झाला आहे. महापालिकेतर्फे तातडीने या ठिकाणी दुरुस्तीचे काम हाती घेण्यात आले आहे. दुरुस्तीचे काम पूर्ण होईपर्यंत वारजे जलशुद्धीकरण केंद्राच्या अखत्यारित संपूर्ण कोथरूड परिसर, वारजे माळवाडी परिसर, बाणेर, बालेवाडी, बावधन व पाषाण परिसर, कर्वे रस्ता, चतु:श्रृंगी, औंध, गणेश खिंड, शिवाजीनगर, गोखलेनगर, प्रभात रस्ता इत्यादी भागातील पाणीपुरवठा बंद आहे.
पर्वती जलशुद्धीकरण केंद्र अखत्यारीत सिंहगड रस्ता परिसर, लष्कर जलशुद्धीकरण केंद्र अखत्यारीत रामटेकडी, हडपसर, मुंढवा, वानवडी, संपूर्ण कोंढवा, खराडी, कॅम्प, येरवडा व खडकी येथील पाणीपुरवठा विस्कळित झाला असून कमी दाबाने पुरवठा होण्याची शक्यता आहे तरी नागरिकांनी सहकार्य करावे, असे आवाहन महापालिकेतर्फे करण्यात आले आहे.