अकरावीच्या दुसऱ्या फेरीची यादी १७ जुलैला होणार जाहीर

पुणे, ता. ७ : इयत्ता अकरावीच्या प्रवेश प्रक्रियेतील दुसरी नियमित फेरी जाहीर झाली आहे. या अंतर्गत विद्यार्थ्यांना १० ते १३ जुलै दरम्यान महाविद्यालयांचा पसंतीक्रम नोंदवून प्रवेश अर्ज लॉक करता येणार असून या फेरीतील गुणवत्ता आणि निवड यादी १७ जुलैला जाहीर होणार आहे.
माध्यमिक व उच्च माध्यमिक शिक्षण विभागाने अकरावीच्या प्रवेशातील दुसऱ्या फेरी सोमवारी जाहीर केली आहे. यानुसार, केंद्रीय प्रवेश प्रक्रियेतील दुसऱ्या प्रवेश फेरीतील प्रवेशासाठी नवीन विद्यार्थी नोंदणी आणि अर्जाचा भाग एकमध्ये दुरुस्ती करणे, विद्यार्थ्यांना त्यांच्या प्राधान्यक्रमाच्या यादीत किमान एक ते कमाल १० उच्च माध्यमिक विद्यालयांचा समावेश करता येणार आहे. नियमित फेरी एकमध्ये प्रवेश न मिळालेल्या विद्यार्थ्यांना पुढील फेरीत प्रवेश आणि पसंतीक्रम अद्ययावत करण्याची सुविधा उपलब्ध असणार आहे. तसेच याचवेळी कोट्याअंतर्गत प्रवेश प्रकिया सुरू असणार आहे.

दुसऱ्या नियमित फेरीचे वेळापत्रक
तपशील : कालावधी
- प्रवेशासाठी नवीन विद्यार्थी नोंदणी व भाग १ मध्ये दुरुस्ती करणे. विद्यार्थी त्यांच्या प्राधान्यक्रमाच्या यादीत किमान एक ते कमाल १० उच्च माध्यमिक विद्यालयांचा समावेश करू शकतात. नियमित फेरी एकमध्ये प्रवेश न मिळालेल्या विद्यार्थ्यांना पुढील फेरीत प्रवाह व पसंतीक्रम अद्ययावत करण्याची सुविधा उपलब्ध आहे. : १० जुलै ते १३ जुलै
- नियमित फेरी-२ साठी Allotment पोर्टलवर जाहीर करणे, विद्यार्थी आणि महाविद्यालय लॉगिनमध्ये निवड यादी आणि तपशील दर्शविणे, विद्यार्थ्यांना एसएमएसद्वारे संदेश पाठविणे. दुसऱ्या फेरीचा कट ऑफ जाहीर करणे : १७ जुलै
- विद्यार्थ्यांनी आपल्याला मिळालेल्या महाविद्यालयात जाऊन आपला प्रवेश निश्चित करणे, प्रोसिड फॉर ॲडमिशनवर क्लिक करणे आणि आवश्यक कागदपत्रांसह संबंधित महाविद्यालयात जाऊन प्रवेश निश्चित करणे, विनंतीनुसार झालेले प्रवेश रद करता येतील : १८ ते २१ जुलै
- रिक्त जागांचा तपशील जाहीर करणे : २३ जुलै

पहिल्या फेरी अंतर्गत झालेले प्रवेश
जिल्हा : झालेले एकूण प्रवेश
पुणे : ४५,५०५
सोलापूर : २०,६३१
अहिल्यानगर : २४,६८७
पुणे विभाग : ९०,८२३