समाज प्रबोधन म्हणजे परंपरा नाकारणे नव्हे

पुणे, ता. १६ : ‘‘समाजाला ज्ञान, न्याय आणि विवेकाचा मार्ग दाखवणे हा प्रवचनकाराचा हेतू असतो. आपल्या परंपरेत सगळ्या गोष्टींची व्याख्या केलेली आहे. मात्र, असे असूनही संतांची आणि परंपरेची वाट चुकीची आहे, असे सांगणारे लोक पुरोगामित्वाचा खोटा मुखवटा धारण करून आत्मवंचना करतात. समाजाचे प्रबोधन करणे म्हणजे परंपरा नाकारणे नव्हे,’’ असे मत व्याख्याते डॉ. शंकर अभ्यंकर यांनी व्यक्त केले.

प्राचार्य शिवाजीराव भोसले स्मृती समिती, पुणेतर्फे यंदाचा ‘प्राचार्य शिवाजीराव भोसले स्मृती सन्मान’ डॉ. शंकर अभ्यंकर यांना मूर्तिशास्त्राचे ज्येष्ठ अभ्यासक डॉ. गो. बं. देगलूरकर यांच्या हस्ते मंगळवारी (ता. १५) प्रदान करण्यात आला. त्यावेळी पुरस्काराला उत्तर देताना डॉ. अभ्यंकर बोलत होते. एस. एम. जोशी सभागृहात झालेल्या कार्यक्रमात समितीचे अध्यक्ष प्रा. मिलिंद जोशी, शिवाजीराव भोसले यांचे चिरंजीव संजीव भोसले आणि स्नूषा रंजना भोसले, साखळीपीर तालीम राष्ट्रीय मारुती मंदिराचे अध्यक्ष रवींद्र माळवदकर उपस्थित होते. शाल, पगडी आणि स्मृतिचिन्ह असे या पुरस्काराचे स्वरूप होते. वसंत व्याख्यानमालेचे आयोजक रवींद्र माळवदकर यांचा ही यावेळी सन्मान करण्यात आला.

डॉ. अभ्यंकर म्हणाले, ‘‘शिवाजीराव भोसले यांनी महाराष्ट्राला ऐकायला शिकवले. अफाट वाचन, चिंतन आणि मननातून शिवाजीरावांनी व्याख्यानाची शैली निर्माण केली होती. समाज प्रबोधनाची आणि सत्वाची रेघ त्यांनी मोठी करून दाखवली, तर बुद्धीची सखोलता, वाणीची निर्मळता आणि प्रज्ञेची अथांगता म्हणजे शिवाजीराव भोसले. शहाण्या माणसात राहूनसुद्धा आपण शहाणे होतो, तर शिवाजीराव भोसले यांच्यासारख्या अभ्यासू आणि प्रभावी वक्त्याच्या भाषणाने किती लोक शहाणे, सजग आणि विवेकी झाले असतील, हे आपल्या लक्षात येते.’’

प्रा. मिलिंद जोशी यांनी पुरस्कार देण्यामागील भूमिका विशद केली. सूत्रसंचालन विनया देसाई यांनी केले. डॉ. अप्पासाहेब पाटील यांनी आभार मानले.