‘आपला दवाखाना’ योजनेला सापत्न वागणूक

पुणे, ता. १६ : झोपडपट्ट्या आणि वस्तीतील नागरिकांना मोफत आरोग्य सुविधा देण्याच्या उद्देशाने सुरू झालेली ‘आपला दवाखाना’ ही योजना महापालिका आणि राज्य शासनाच्या मतभेदांमुळे अंमलबजावणीपूर्वीच अडकली आहे. दोन वर्षांत ५८ पैकी फक्त ११ ठिकाणीच दवाखाने सुरू झाले असून, उर्वरित केंद्रे कागदावरच मर्यादित राहिली आहेत.

दवाखान्यांच्या जागांवरून वाद
ही योजना राष्ट्रीय नागरी आरोग्य अभियानांतर्गत राज्य शासनाच्या मार्गदर्शनाखाली सुरू केली. शासनाने दर केंद्रासाठी १ लाख रुपयांचे अनुदान देण्याची तयारी दर्शवली होती. ५८ ठिकाणी केंद्र उभारणीचे नियोजन होते. त्यापैकी २५ जागा महापालिकेच्या मालकीच्या, तर ३३ जागा भाडेतत्त्वावर होत्या. मात्र, तत्कालीन महापालिका आयुक्तांनी फक्त महापालिकेच्या मालकीच्या जागांवरच दवाखाने सुरू करण्याचा प्रस्ताव दिला. शासनाने त्याला नकार दिल्याने योजना अर्धवटच राहिली.

बैठकीची प्रतीक्षा, निर्णय अनिश्चित
महापालिका आयुक्त पुढच्या आठवड्यात संबंधित विभागांबरोबर बैठक घेणार असून, त्यात जागांची स्पष्टता, सुविधा नियोजन आणि निधीच्या वापरावर निर्णय होण्याची शक्यता आहे, अशी माहिती अधिकाऱ्यांनी दिली.

सध्या कार्यरत असलेले ११ दवाखाने
महापालिकेचा : वाघोली
शासनाचे : धानोरी, खांडवेनगर, कलवड रस्ता, टिंगरेनगर, स्वारगेट, गुजर-निंबाळकर वाडी, ताडीवाला रस्ता, केशवनगर, उत्तमनगर, वाघोली-लोहगाव रस्ता