ससून रुग्णालयात परिचारिकांचे आंदोलन सातव्या वेतनआयोगातील त्रुटी दूर करण्याची मागणी

पुणे, ता. १७ : सातव्या वेतन आयोगातील त्रुटी दूर कराव्यात व कंत्राटी परिचारिका भरतीच्या निषेधार्थ महाराष्ट्र राज्य परिचारिका संघटनेने गुरुवारी राज्यव्यापी आंदोलन सुरु केले. ससून सर्वोपचार रुग्णालयातील परिचारिकाही यामध्ये सहभागी झाल्या. मागण्या पूर्ण होईपर्यंत अनिश्चित काळापर्यंत संप सुरु राहणार असल्याचे संघटनेकडून सांगण्यात आले.
जवळपास निम्म्या परिचारिका संपावर गेल्यामुळे रुग्णसेवेवरही परिणाम झाला होता. २०१९ मध्ये सातवा वेतन आयोग लागू करण्यात आला. त्यात त्रुटी आहेत. यामध्ये अधिपरिचारिका, परिसेविका, पाठयनिर्देशिका तसेच सार्वजनिक आरोग्य विभागातील बालरोग परिचारिका या पदावरील अन्याय दूर न झाल्याने परिचारिकांनी संपाचा निर्णय घेतला.
गेल्या ४० वर्षापासून परिचारिकांचे प्रलंबित असलेले भत्ते मंजूर करावे व इतर महत्वाच्या प्रलंबित मागण्याच्या पूर्ततेसाठी महाराष्ट्र राज्य परिचारिका संघटनेच्या नेतृत्वाखाली १७ जुलै रोजी राज्यव्यापी कामबंद आंदोलन करण्यात आले. मागण्यांची दखल न घेतल्याने राज्यव्यापी बेमुदत कामबंद आंदोलन केले जाणार असल्याची माहिती महाराष्ट्र राज्य परिचारिका संघटना पुणे शाखेच्या अध्यक्षा आरिफा शेख, सचिव विनय देसाई यांनी दिली.
--------------------
‘‘ससून रुग्णालयात तीन शिफ्टमध्ये ९०० हून अधिक परिचारिका कार्यरत आहेत. त्यापैकी ३४५ परिचारिकांनी संपात भाग घेतला होता. इतर परिचारिका कामावर असल्याने रुग्णसेवेवर फारसा परिणाम झाला नाही.
- डॉ. एकनाथ पवार, अधिष्ठाता, ससून रुग्णालय
-----------