साडेसात कोटींचा अमली पदार्थ परदेशी महिलेकडून जप्त

पुणे, ता. १७ : मुंबई- बंगळूरू महामार्गावरून बसमधून प्रवास करणाऱ्या परदेशी महिला प्रवाशाकडून
महसूल गुप्तचर संचालनालयाच्या (डीआरआय) पुणे विभागाने तब्बल साडेसात कोटी रुपयांचा अमली पदार्थ जप्त केला आहे. ही महिला दिल्लीहून बंगळुरूला बसने प्रवास करत होती. अमली पदार्थ प्रतिबंधक कायद्यानुसार तिला अटक करण्यात आली आहे.
‘डीआरआय’ला मिळालेल्या गोपनीय माहितीच्या आधारे ही कारवाई करण्यात आली. दिल्लीहून बंगळुरूकडे निघालेल्या एका खासगी बसवर पुणे सीमाशुल्क विभागाच्या सहकार्याने नजर ठेवण्यात आली. संशयित महिलेची तपासणी करण्यात आली. सुरवातीला तिच्या अंगझडतीत व बॅगेत काहीही आढळून आले नाही. मात्र, बसची सखोल झडती घेतली असता, मागील बाजूस लपवलेली दुसरी पिशवी सापडली. त्यात सहा सलवार सूट होते. त्यात कागदाच्या पट्ट्यांमध्ये अमली पदार्थ गुंडाळलेले होते. त्या पट्ट्यांत खास तयार केलेल्या कप्प्यांमध्ये पारदर्शक आवरणात पांढऱ्या स्फटिकांसारखा पदार्थ ठेवलेला आढळून आला. त्याचे एकूण वजन ३.८१५ किलो असून, प्राथमिक तपासणीत मेथाम्फेटामिन असल्याचे निष्पन्न झाले. या अमली पदार्थाची आंतरराष्ट्रीय बाजारात अंदाजे किंमत सात कोटी ६३ लाख रुपये आहे.
------------------------