खेड, हवेलीतून सर्वाधिक हरकती

पुणे, ता. २१ : जिल्हा परिषद आणि पंचायत समित्यांच्या गट व गणांच्या प्रारूप रचनेवर २१७ हरकती नोंदविण्यात आल्या आहेत. सोमवारी हरकती नोंदविण्याचा अंतिम दिवस होता. यामध्ये सर्वाधिक हरकती खेड आणि हवेली तालुक्यातून आल्या असल्याची माहिती जिल्हा प्रशासनाने दिली.
खेड तालुक्यातून सर्वाधिक ८७ हरकती नोंदविण्यात आल्या आहेत. त्याखालोखाल हवेली तालुक्यातून ६२, शिरूर तालुक्यातून १६, मुळशीमधून १०, जुन्नर आणि इंदापूरमधून प्रत्येकी नऊ, दौंडमधून सात, आंबेगाव आणि मावळमधून पाच, वेल्हा, भोर आणि बारामतीमधून प्रत्येकी दोन हरकती नोंदविण्यात आल्या आहेत. तर, सर्वाधिक कमी पुरंदर तालुक्यातून एकच हरकत नोंदविली आहे.
दरम्यान, पुणे जिल्हा परिषदेच्या ७३ गट आणि पंचायत समितीच्या १४६ गणांच्या रचनेचे प्रारूप १४ जुलैला जिल्हा प्रशासनाने प्रसिद्ध केले होते. त्यावर हरकती आणि सूचना नोंदवण्यासाठी सोमवारी (ता. २१) शेवटचा दिवस होता.

तहसीलदारांचा अभिप्राय मागविणार
हरकती आणि सूचनांवर संबंधित तहसीलदारांकडून अभिप्राय मागविला जाणार आहे. त्यासाठी २८ जुलैपर्यंत मुदत दिली आहे. यानंतर, प्राप्त झालेल्या हरकती आणि सूचनांवर विभागीय आयुक्त सुनावणी घेऊन ११ ऑगस्टपर्यंत निर्णय देतील. यानंतर, जिल्हाधिकारी अंतिम प्रभाग रचना मान्यतेसाठी निवडणूक आयोगाकडे पाठवणार जाणार आहे.