स्वारगेट पोलिसांकडून दुचाकी चोरास अटक

पुणे, ता. २४ : शहराच्या वेगवगेळ्या भागांतून दुचाकी चोरणाऱ्या चोरट्यास स्वारगेट पोलिसांनी अटक केली. पोलिसांनी त्याच्याकडून दोन दुचाकी जप्त केल्या.
राज परमेश्वर कदम (वय २६, रा. लक्ष्मीनगर, पर्वती) असे अटक केलेल्याचे नाव आहे. पोलिसांनी दिलेल्या माहितीनुसार, मार्केट यार्ड येथून एक दुचाकी चोरीस गेली होती. तसेच मागील आठवड्यात मित्रमंडळ चौक परिसरातूनही आणखी एक दुचाकी चोरीला गेली होती. दरम्यान, याप्रकरणी स्वारगेट पोलिसांकडून तपास सुरू करण्यात आला होता. पोलिसांच्या तपासात कदम याने दुचाकी चोरल्याची माहिती रात्र गस्तीवर असलेल्या पोलिस कर्मचाऱ्यास मिळाली होती. त्यानुसार, पोलिसांनी कदम यास सापळा रचून अटक केली. पोलिसांनी त्याची अधिक चौकशी केल्यानंतर त्याने दोन दुचाकी चोरल्याचे सांगितले. त्यानुसार पोलिसांनी त्याच्याकडून दोन दुचाकी जप्त केल्या. सहायक पोलिस निरीक्षक अभिजित पाटील, उपनिरीक्षक रवींद्र कस्पटे, पोलिस कर्मचारी अश्रुबा मोराळे, हर्षल शिंदे, हनुमंत दुधे, फिरोज शेख, सुजय पवार, रमेश चव्हाण, दीपक खेंदाड यांच्या पथकाने ही कामगिरी केली.