सीबीआय अधिकारी भासवून महिलेची पाच लाखांची फसवणूक

पुणे, ता. २४ : सीबीआय अधिकारी असल्याचे भासवून एका तरुणाने महिलेला लग्नाचे आमिष दाखवून तिची पावणेपाच लाखांची फसवणूक केली. याप्रकरणी वानवडी पोलिस ठाण्यात गुन्हा दाखल करण्यात आला आहे.
शिरीष जयंतीलाल गोहेल ऊर्फ चिराग मित्तल (वय २७, रा. ससाणेनगर, हडपसर) असे गुन्हा दाखल झालेल्याचे नाव आहे. याप्रकरणी फातिमानगरमधील ४२ वर्षीय महिलेने फिर्याद दाखल केली होती. ही घटना १८ जुलै २०२४ ते २३ जुलै २०२५ या कालावधीत घडली आहे.
पोलिसांनी दिलेल्या माहितीनुसार, शिरीषने फिर्यादी महिलेशी फेसबुकद्वारे संपर्क साधला होता. त्यानंतर त्याने सीबीआय अधिकारी व परवानाधारक इथिकल हॅकर असल्याचे सांगून महिलेसमवेत मैत्री वाढवली. विश्वास संपादन केल्यानंतर त्याने तिला लग्नाची मागणी घातली. दरम्यान त्याने आपल्या हृदय शस्त्रक्रियेसाठी, बहिणीच्या प्रसूतीसाठी आणि अन्य वैयक्तिक कारणांसाठी महिलेकडून ऑनलाइन, धनादेशाद्वारे व रोख स्वरूपात मिळून चार लाख रुपये घेतले. तसेच महिलेकडील सोन्याचे दागिने, सोनसाखळी, दोन अंगठ्या वित्तपुरवठा कंपनीत गहाण ठेवून त्यावर ८० हजार रुपयांचे कर्ज काढले.