सहकार पुरस्काराच्या प्रस्तावासाठी मुदतवाढ

पुणे, ता. २६ : सहकार चळवळीमध्ये उत्कृष्ट योगदान दिलेल्या राज्यातील सहकारी संस्थांना सहकार पुरस्कार देण्यात येतो. या पुरस्कारासाठी प्रस्ताव दाखल करण्याची मुदत गुरुवारपर्यंत (ता. ३१) वाढविण्यात आली असल्याची माहिती सहकार आयुक्त दीपक तावरे यांनी दिली.
सहकारी संस्थांना सन २०२३-२४ या आर्थिक वर्षामधील कामगिरीच्या आधारावर शासनामार्फत सहकार पुरस्कार देऊन गौरविण्यात येणार आहे. तालुका, वॉर्ड स्तरावरील उप, सहायक निबंधक, सहकारी संस्था कार्यालयात सहकार पुरस्कार प्रस्ताव दाखल करता येणार आहेत. ‘सहकारमहर्षी’, ‘सहकारभूषण’ आणि ‘सहकारनिष्ठ’ असे तीन प्रकारचे पुरस्कार असणार आहेत. याबाबत आयुक्त तावरे म्हणाले, ‘‘लोकप्रतिनिधी, पदाधिकारी, संचालक, सभासद आणि कर्मचाऱ्यांच्या निःस्वार्थ सेवेमुळे सहकारी संस्थांनी उल्लेखनीय यश मिळवले आहे. या कामगिरीचा गौरव करण्यासाठी शासनाने ‘सहकार पुरस्कार’ देण्याचा निर्णय घेतला आहे. आंतरराष्ट्रीय सहकार वर्षामध्ये जास्तीत जास्त सहकारी संस्थांना पुरस्कार मिळण्यासाठी प्रस्ताव दाखल करता यावेत, यासाठी हे प्रस्ताव दाखल करावेत.’’

पुरस्कारांचे स्वरूप :
सहकारमहर्षी पुरस्कार : १ संस्था, एक लाख रुपये
सहकारभूषण पुरस्कार : २१ संस्था, ५१ हजार रुपये
सहकारनिष्ठ पुरस्कार : २३ संस्था, २५ हजार रुपये