पोलिस ठाण्याच्या आवारात सासुवर चाकूने हल्ला

पुणे, ता. १५ : कौटुंबिक हिंसाचाराची तक्रार देण्यासाठी मुलीबरोबर आलेल्या सासुवर जावयाने चाकूने वार केल्याची घटना पोलिस ठाण्याच्या आवारात घडली. हडपसर पोलिस ठाण्यात शनिवारी (ता. ११) हा प्रकार घडला.
चाकू हल्ला होत असल्याचे एका पोलिस उपनिरीक्षकाने पाहिल्याने त्यांनी प्रसंगावधान राखून संबंधिताला पकडले. त्यामुळे मोठा अनर्थ टळला. पुष्पा दामोदर पालवे (वय ४६, रा. महादेवनगर, मांजरी) असे जखमी सासूचे नाव आहे. या प्रकरणी जावई मंगेश महादा तारे (वय २९, रा. वडगाव शेरी) याला अटक केली आहे. याबाबत सासरे दामोदर यांनी हडपसर ठाण्यात फिर्याद दिली.
पोलिसांनी दिलेल्या माहितीनुसार, मंगेश आणि त्याची पत्नी पूजा हे वडगाव शेरीत राहायला आहेत. मंगेश पत्नीला त्रास देत होता. त्यामुळे पूजा माहेरी निघून आली होती. पूजा आणि तिची आई पुष्पा शनिवारी सायंकाळी हडपसर पोलिस ठाण्यात तक्रार देण्यासाठी आल्या होत्या. त्यावेळी मंगेश तेथे आला. आमच्यात वाद नसल्याचे त्याने पोलिसांना सांगितले. त्यानंतर सासू पुष्पा यांचे पाय त्याने धरले आणि पाया पडण्याचा बहाणा केला. त्यानंतर मंगेशने स्वेटरमध्ये लपविलेला चाकू बाहेर काढला आणि सासू पुष्पा यांच्यावर हल्ला चढविला. त्यावेळी पोलिस उपनिरीक्षक संतोष गोरे तेथे होते. त्यांनी त्वरित मंगेशला रोखले व चाकू ताब्यात घेतला. रात्री उशिरा त्याला अटक केली, असे हडपसर ठाण्याचे वरिष्ठ पोलिस निरीक्षक अरविंद गोकुळे यांनी सांगितले.