‘ग्लोबल ॲफिलेट’वर ‘ईडी’चे छापे

पुणे, ता. ३ : सक्तवसुली संचलनालयाकडून (ईडी) पुणे आणि अहमदनगर परिसरातील व्हीआयपीएस ग्रुप आणि ग्लोबल ॲफिलेट बिझनेस या खासगी वित्तीय संस्थेच्या कार्यालयांवर छापे टाकण्यात आले. या कारवाईत १८ कोटी ५४ लाख रुपयांची मालमत्ता जप्त करण्यात आली आहे. कंपनीने आभासी चलनात गुंतवणुकीच्या आमिषाने गुंतवणुकदारांकडून १२५ कोटी रुपये घेतले आहेत. ही रक्कम त्याने हवाला व्यवहारामार्फत वळविली असल्याचा संशय ‘ईडी’ने व्यक्त केला आहे. व्हीआयपीएस ग्रुप आणि ग्लोबल ॲफिलेट वित्तीय संस्थेचा प्रमुख विनोद खुटे याने गुंतवणुकदारांना त्याच्या योजनांची माहिती देण्यासाठी ॲपचा वापर केला आहे. या ॲपचे नाव ग्लोबल ॲफिलेट बिझनेस असे आहे. खुटे याने त्याच्या योजनेत अन्य गुंतवणुकदारांना सहभागी करून घेतल्यास गुंतवणुकदारांना चांगला परतावा देण्याचे आमिष दाखविले होते. अशा पद्धतीने त्याने १२५ कोटी रुपयांची फसवणूक केल्याचा संशय आहे.