स्वयंभू नेतृत्व गेल्याने समाजाची हानी

पिंपरी, ता. १४ : जमिनीशी जोडलेले, लोकांशी जोडलेले स्वयंभू नेतृत्व गेल्यावर समाजाची हानी होते. परंतु; त्यांच्याकडून प्रेरणाही मिळते. भंडारा डोंगरावरील संत तुकाराम महाराज यांच्या मंदिराला मदत करण्याची दिवंगत आमदार लक्ष्मण जगताप यांचे स्वप्न होते. आपण ते स्वप्न पूर्ण केले पाहिजे. राज्य सरकारच्यावतीने जिल्हा नियोजन माध्यमातून या मंदिरासाठी पाच कोटी रुपये देऊ, असे आश्‍वासन उपमुख्यमंत्री देवेंद्र फडणवीस यांनी शनिवारी (ता. १४) चिंचवड येथे दिले.
दिवंगत आमदार जगताप यांना प्रा. रामकृष्ण मोरे प्रेक्षागृहात सर्वपक्षीयांच्यावतीने शोकसभेचे आयोजन केले होते. यावेळी फडणवीस बोलत होते. पुणे जिल्ह्याचे पालकमंत्री चंद्रकांत पाटील, आरोग्य मंत्री तानाजी सावंत, ग्रामीण विकास मंत्री गिरीश महाजन, खासदार श्रीरंग बारणे, माजी मंत्री लक्ष्मण ढोबळे, बाळा भेगडे, अविनाश महातेकर, मुंबई कॉंग्रेसचे अध्यक्ष व आमदार भाई जगताप, भाजपचे पिंपरी-चिंचवड शहराध्यक्ष व आमदार महेश लांडगे, आमदार उमा खापरे, आमदार अण्णा बनसोडे, विलास लांडे, राष्ट्रवादीचे शहराध्यक्ष अजित गव्हाणे, ॲड. सचिन भोसले, मनसेचे बाबू वागसकर, आरपीआयच्या चंद्रकांता सोनकांबळे, दिलीप बंड आदि यावेळी उपस्थित होते.
फडणवीस म्हणाले की, आमदार लक्ष्मण जगताप यांच्या नावाने विधी महाविद्यालय सुरु केले जाईल. विलास लांडे यांनी मागणी केली; त्याला चंद्रकांत पाटील यांनी मंजुरी दिली. महापालिकेच्यावतीने कर्करोग रुग्णालय सुरु करण्यात येणार आहे, आमदार महेश लांडगे यांच्या मागणीनुसार या रुग्णालयालाही लक्ष्मण जगताप यांचे नाव देण्यात येणार आहे.
‘लक्ष्मण पर्व’ या ‘सकाळ’च्या कॉफी टेबल बुकचा उल्लेखही फडणवीस यांनी भाषणात केला.

गिरीश महाजन, श्रीरंग बारणे, अण्णा बनसोडे, भाई जगताप, भाऊसाहेब भोईर, मानव कांबळे, मारुती भापकर व शहरातील विविध पक्ष, संघटना, संस्थांच्या पदाधिकाऱ्यांनी आमदार जगताप यांना श्रद्धांजलीपर मनोगत व्यक्त केले. बी. के. कोकटे यांनी सूत्रसंचालन केले. महेश लांडगे यांनी आभार मानले.

PNE23T18433