आळंदी यात्रा

आळंदी कार्तिकी यात्रेसाठी
१२ डिसेंबरपासून ३४२ बस

पुणे, ता. ४ ः कार्तिकी एकादशी व संत ज्ञानेश्वर महाराज यांच्या संजीवन समाधी सोहळ्यानिमित्त आळंदी यात्रेसाठी सहा ते १२ डिसेंबर दरम्यान मार्गावरील ११३ व जादा २२९ अशा मिळून ३४२ बस देण्यात येणार असल्याचे ‘पीएमपी’ने जाहीर केले आहे.
यात्रेदरम्यान आठ ते ११ डिसेंबर दरम्यान रात्र बससेवा गरजेनुसार प्रवाशांना उपलब्ध करून देण्यात येणार आहे. यात्रेनिमित्ताने आळंदी गावातील सध्याचे बसस्थानक स्थलांतरित करून काटेवस्ती येथून बसचे संचलन करण्यात येणार असल्याचे ‘पीएमपी’ने नमूद केले आहे.
यात्रेसाठी देण्यात येणाऱ्या जादा बससाठी रात्री ११ नंतर (नेहमीची बससेवा संपल्यानंतर) सध्याच्या तिकीट दरापेक्षा पाच रुपये जादा तिकीटदर आकारणी करण्यात येईल. तसेच ‘पीएमपी’कडून देण्यात येणाऱ्या एकदिवसीय, साप्ताहिक, मासिक, ज्येष्ठ नागरिक व इतर पासधारकास यात्रा कालावधीत रात्री ११ नंतर जादा बससेवेसाठी पासचा वापर करून प्रवास करता येणार नाही.
आळंदी यात्रेसाठी येणाऱ्या भाविकांच्या वाहतुकीच्या सोईसाठी जादा बस या पुणे शहरातील बसमार्गावरील संचलनात असलेल्या बसमधूनच काही बस कमी करून यात्रा स्पेशल बससेवा देण्यात येणार आहे. त्याचप्रमाणे आळंदी मार्गावरील मार्ग क्रमांक २६४ भोसरी ते पाबळ व मार्ग क्रमांक २५७ आळंदी ते मरकळ हे मार्ग यात्रेच्या काळात संपूर्णतः बंद राहतील. तरी संबंधित मार्गावरील प्रवासी नागरिकांनी ‘पीएमपीएमएल’ला सहकार्य करावे, असे आवाहन ‘पीएमपी’ने केले आहे.

या ठिकाणांवरून बससेवा
स्वारगेट ते आळंदी, हडपसर ते आळंदी, पुणे स्टेशन ते आळंदी, मनपा भवन ते आळंदी, निगडी ते आळंदी, पिंपरी ते आळंदी, चिंचवड ते आळंदी, देहूगाव ते आळंदी, भोसरी ते आळंदी, रहाटणी ते आळंदी.