दस्तनोंदणीचे रजिस्टेशन संगणक प्रणालीद्वारे होणार

दस्तनोंदणीचे रजिस्ट्रेशन संगणक प्रणालीद्वारे होणार

पुणे, ता. १० : राज्याच्या नोंदणी व मुद्रांक विभागाने बांधकाम प्रकल्पात २० पेक्षा अधिक सदनिका अथवा दुकाने असतील तर त्या प्रकल्पांमध्ये दस्तनोंदणीसाठी ई रजिस्ट्रेशन ही संगणक प्रणाली उपलब्ध करून दिली आहे.

या उपक्रमाची भुरळ दिल्ली सरकारने पाडली असून त्यांनी सोमवारी तेथील अधिकाऱ्यांनी नोंदणी विभागाला भेट देऊन या प्रकल्पाची माहिती घेतली. दस्तनोंदणी प्रक्रिया सुलभ करण्यासाठी नोंदणी व मुद्रांक विभाग सातत्याने आधुनिक तंत्रज्ञानाचा वापर करत आहे. नागरिकांना ऑनलाइन सुविधा देण्यात नोंदणी विभाग अग्रेसर आहे. मागील काही वर्षांपासून नोंदणी विभागाने कात टाकली असून संगणक प्रणालीचा वापर करून अधिकाधिक सुविधा नागरिकांना घरबसल्या कशा मिळतील, यावर भर दिला जात आहे. ही सुविधा फक्त नवीन सदनिकांसाठीच (फर्स्ट सेल)असणार आहे. यामुळे दस्त नोंदणीसाठी दुय्यम निबंधक कार्यालयात जावे लागत नाही. त्याचबरोबर दुय्यम निबंधक कार्यालयात होणारी गर्दी कमी होण्यास यामुळे मदत होत आहे.
यासंदर्भात नोंदणी महानिरीक्षक श्रावण हर्डीकर म्हणाले,‘‘नोंदणी व मुद्रांक कार्यालयात दिल्ली राज्य शासनाच्या चार अधिकाऱ्यांनी भेट देऊन ई रजिस्ट्रेशनबरोबरच अन्य ऑनलाइन सुविधेची माहिती दिली. तसेच प्रत्यक्ष ई रजिस्ट्रेशन कसे होते, याची प्रत्यक्ष माहिती घेतली.’