ग्रामपंचायत पोटनिवडणुकीसाठी १८ मे रोजी मतदान ः खराडे

पुणे, ता. १० : जिल्ह्यातील सुमारे १९५ ग्रामपंचायतीतील २८० सदस्य आणि १० थेट सरपंचांच्या रिक्तपदांच्या पोटनिवडणुकांसाठी १८ मे रोजी मतदान होणार आहे. तर मतमोजणी १९ मे रोजी होणार आहे, अशी माहिती निवासी उपजिल्हाधिकारी हिम्मत खराडे यांनी दिली आहे.

निधन, राजीनामा, अपात्र किंवा अन्य कारणांमुळे रिक्त झालेल्या सदस्य आणि थेट सरपंचपदांच्या पोटनिवडणुकांसाठी राज्य निवडणूक आयोगाने घोषित केलेल्या कार्यक्रमानुसार हे मतदान होत आहे. उमेदवारी अर्ज २५ एप्रिल ते २ मे या कालावधीत सकाळी ११ ते दुपारी ३ पर्यंत दाखल करता येतील. २९एप्रिल, ३०एप्रिल आणि १ मे या सार्वजनिक सुट्टीच्या दिवशी उमेदवारी अर्ज दाखल करता येणार नाही. उमेदवारी अर्ज छाननी ३ मे रोजी सकाळी ११ वाजता सुरू होईल. तर ८ मे रोजी दुपारी ३ वाजेपर्यंत अर्ज मागे घेता येतील. त्याच दिवशी दुपारी ३ वाजेनंतर अंतिमरित्या निवडणूक लढविणाऱ्या उमेदवारांची यादी प्रसिद्ध होईल आणि निवडणूक चिन्हांचे वाटप केले जाईल. १८ मे रोजी सकाळी ७.३० ते सायंकाळी ५.३० या वेळेत मतदान होईल. तर मतमोजणी १९ मे रोजी होणार आहे.