अक्षय्य तृतीयेच्या मुहूर्तावर दस्तनोंदणी कार्यालये सुरू

पुणे, ता. २० : अक्षय्य तृतीयेच्या मुहूर्तावर नागरिकांच्या मागणीनुसार सह दुय्यम निबंधक कार्यालये शासकीय सुटीच्या दिवशी म्हणजे शनिवारी (ता. २२) सुरू ठेवण्याचे निर्देश राज्याचे नोंदणी महानिरीक्षक व मुद्रांक नियंत्रण हिरालाल सोनवणे यांनी दिले आहेत.
साडेतीन मुहूर्तापैकी अक्षय्य तृतीयेचा मुहूर्त एक असल्याने त्या दिवशी स्थावर मालमत्ता खरेदी-विक्रीचे व्यवहार होतात. त्यानुसार नागरिकांना जमीन, सदनिका आदी खरेदी-विक्री करता यावी, यासाठी प्रत्येक जिल्ह्यात काही ठराविक सह दुय्यम निबंधक कार्यालये सुरू ठेवण्यात येणार आहेत. त्यानुसार शहरातील सह दुय्यम निबंधक कार्यालये सुरू ठेवणार आहेत.
यामध्ये सिद्धी टॉवर दापोडी, हवेली क्र. १७ आणि युगाई मंगल सभागृह एरंडवणे व हवेली क्र. २२ ही सह दुय्यम निबंधक कार्यालये दुपारी १ ते रात्री ८.४५ वाजता तर युगाई मंगल सभागृह एरंडवणे, हवेली क्र. २१ आणि सिद्धी टॉवर दापोडी, हवेली क्र. २५ ही कार्यालये सकाळी ७.३० ते दुपारी ३.३५ वाजेपर्यंत तर शासकीय छायाचित्र नोंदणी कार्यालय इमारत, हवेली क्र. २३ ही कार्यालये सकाळी ९.४५ ते सायंकाळी ६.१५ वाजेपर्यंत सुरू राहणार आहेत.