मुळशी खुर्दमधील रखडलेल्या पुलासाठी महाराष्ट्र दिनी आंदोलन

पुणे, ता. २२ : मुळशी खुर्द ते वाघवाडी-वडगांव पूल हा मुळशी धरणग्रस्तांच्या पुनर्वसनासाठी अत्यावश्यक आहे. मुळशी जलाशयावरील हा पूल लवकरात लवकर पूर्ण करावा, या मागणीसाठी ‘जलतरण प्रवास’ आंदोलन करणार असल्याचे माजी आमदार शरद ढमाले यांनी पत्रकार परिषदेत सांगितले.
राज्याच्या यंदाच्या अर्थसंकल्पातही पुलासाठी कोणतीही तरतूद नाही. या कामाकडे सरकारचे लक्ष परत वेधण्यासाठी सेनापती बापट जलसागर, मुळशी खुर्द येथे १ मे रोजी सकाळी १०:३० वाजता दोन ते तीन किलोमीटरचे अंतर पोहून प्रतीकात्मक निषेध नोंदविणार असल्याचे ढमाले यांनी स्पष्ट केले.
हा पूल उभारण्यात यावा, यासाठी पालकमंत्री, ऊर्जामंत्री, पुनर्वसनमंत्री यांच्याकडे वारंवार पाठपुरावा करूनही त्याचे काम गेल्या १५ वर्षांपासून रखडले आहे. या पुलामुळे मुळशी धरण भागातील २० ते २५ गावे थेट मुळशी तालुक्याशी जोडण्यास मदत होईल, म्हणून हा पूल झाला पाहिजे, अशी धरणग्रस्तांची मागणी असल्याचे ढमाले यांनी सांगितले.