विद्यापीठाच्या मुख्य इमारतीला आग

पुणे, ता. २९ ः सावित्रीबाई फुले पुणे विद्यापीठाच्या ऐतिहासिक मुख्य इमारतीला शुक्रवारी संध्याकाळी आग लागली. इमारतीवरील राष्ट्रध्वज उतरविण्यासाठी जाणाऱ्या महाराष्ट्र सुरक्षा बलाच्या जवानांनी आग विझविली आणि अग्निशमन दलालाही पाचारण केले.
वरिष्ठ अधिकाऱ्यांकडून मिळालेल्या माहितीनुसार, मुख्य इमारतीच्या छतावर स्थावर विभागाकडून डांबरकाम करण्यात येत होते. त्यातील डांबर वितळविण्यासाठी वापरण्यात येणाऱ्या हिटरमुळे आग लागल्याचा प्राथमिक अंदाज वर्तविण्यात येत आहे. इमारतीच्यावर लाकडाचे बांधकाम, त्यात डांबरशीटाने पेट घेतल्याने लवकरच आग धुमसली. सुरक्षा रक्षकांनी तातडीने अग्निशमन यंत्रणेचा वापर केला, तसेच अग्निशमन दलालाही पाचारण केले. मुख्य इमारतीला लागलेली आग म्हणजे प्रशासनाचे दुर्लक्ष असल्याचा आरोप स्टुडंट हेल्पींग हॅंडचे अध्यक्ष कुलदीप आंबेकर यांनी केला. ते म्हणाले, ‘‘वारसा स्थळ असलेल्या इमारतीचे ऑडिट होणे गरजेचे आहे. या ऐतिहासिक आणि महत्त्वाच्या वास्तुकडे विद्यापीठ प्रशासनाचे दुर्लक्षिपणा दिसून येत आहे.’’ कुंपणे वाढविण्यापेक्षा इमारतीच्या सुरक्षेकडे लक्ष द्या, असेही आंबेकर म्हणाले.

पावसाळ्यापूर्वी मुख्य इमारतीवर डांबराचे शीट लावण्याचे काम करण्यात येते. डांबरशीटनेच पेट घेतल्यामुळे मोठ्या प्रमाणावर काळा धूर निघाला. खबरदारी म्हणून अग्निशमन दलाला पाचारण करण्यात आले. १५ मिनिटांच्या आत आग विझली असून, कोणतेही नुकसान झालेले नाही.
- डॉ. प्रफुल्ल पवार,
कुलसचिव, सावित्रीबाई फुले पुणे विद्यापीठ