राज्य सरकारकडून पर्यावरण समिती स्थापन

पुणे, ता. १२ ः महाबळेश्‍वर-पाचगणी या पर्यावरणदृष्ट्या अतिसंवेदनशील क्षेत्रातील ध्वनिप्रदूषण आणि वाहतूक नियमन व नियंत्रण करण्यासह इतर आनुषंगिक कामे करण्यासाठी राज्य सरकारकडून दहा सदस्यांची समिती स्थापन केली आहे. या समितीच्या अध्यक्षपदी नगररचना विभागाचे माजी संचालक सुधाकर नांगनुरे यांची नियुक्ती केली आहे.

महाबळेश्वर-पाचगणी प्रदेश संरक्षित व संवर्धित राहण्याच्या दृष्टीने पर्यावरण (संरक्षण) कायदा १९८६ च्या तरतुदीअंतर्गत ‘पर्यावरणदृष्ट्या संवेदनशील विभाग’ म्हणून घोषित केला आहे. पर्यावरणदृष्ट्या संवेदनशील असलेल्या या ठिकाणी ध्वनिप्रदूषण, वाहतूक नियमन व नियंत्रण करण्यासाठी केंद्र शासनाच्या आदेशानुसार समिती स्थापन करणे आवश्‍यक होते. त्यानुसार राज्य सरकारकडून ही समिती स्थापन केली आहे. नांगनुरे यांच्या अध्यक्षतेखाली स्थापन केलेल्या समितीमध्ये महाबळेश्‍वरचे मुख्य वनसंरक्षक, नगर विकास विभागाचे सहसचिव, साताऱ्याचे जिल्हाधिकारी, जिल्हा परिषदेचे मुख्य कार्यकारी अधिकारी, सहसंचालक नगर रचना पुणे विभाग, प्रदूषण नियंत्रण मंडळाचे प्रादेशिक अधिकारी, नगरपालिका प्रशासनाचे प्रादेशिक उपसंचालक यांच्यासह पर्यावरण तज्ज्ञ डॉ. अंकुर पटवर्धन, डॉ. पूर्वा केसकर यांची सदस्य म्हणून नियुक्ती केली आहे. या समितीचा कार्यकाल तीन वर्षांचा असणार आहे. याबाबतचे आदेश नगर विकास विभागाच्या सहसचिव डॉ. प्रतिभा भदाने यांनी काढले आहेत.

नांगनुरे हे निवृत्त संचालक असून त्यांनी यापूर्वी मंत्रालयात नगर विकास विभागाचे उपसचिव म्हणून काम पाहिले आहे. असेच नोंदणी व मुद्रांक विभागात नगररचना सहसंचालक (मूल्यांकन) या पदावर सुद्धा काम केले आहे. केंद्र शासनाच्या अधिसूचनेनुसार पर्यावरणदृष्ट्या संवेदनशील विभाग म्हणून घोषित केलेल्या माथेरान व डहाणू या प्रदेशाच्या संनियंत्रण समितीवर सदस्य व सदस्य सचिव म्हणून काम केले आहे.