Pune Crime : सहकारनगर परिसरात दहशत पसरविणाऱ्यांवर मोका

पुणे - सहकारनगर भागात वाहनांची तोडफोड करून दहशत पसरविणाऱ्या टोळीवर महाराष्ट्र संघटित गुन्हेगारी नियंत्रण कायद्यान्वये (मोका) ची कारवाई करण्यात आली आहे.

टोळीतील गुंडांनी सहकारनगर भागातील तळजाई वसाहत परिसरात १९ जून रोजी वाहनांची तोडफोड करून दहशत पसरविली होती. दिग्विजय ऊर्फ पपुल्या तुकाराम वाघमारे (वय २०, रा. रामनगर, वारजे), कमल चक्रबहाद्दुर साह (वय १९, रा. चव्हाणनगर, धनकवडी), भगवान धाकलू खरात (वय २०, रा. श्रमिक वसाहत, कर्वेनगर), लिंगाप्पा ऊर्फ नितीन सुरेश गडदे (वय २०) आणि देविदास बसवराज कोळी (वय १९, दोघेही रा. कर्वेनगर) अशी मोकानुसार कारवाई केलेल्यांची नावे आहेत. या प्रकरणात दोन अल्पवयीन मुलांना ताब्यात घेतले असून, तीन आरोपी पसार आहेत.

आरोपींनी नागरिकांना शस्त्राचा धाक दाखविला होता. वाघमारे टोळीप्रमुख असून, अल्पवयीन मुलांना पैशांचे आमिष दाखवून हे गुन्हे केल्याचे तपासात उघडकीस आले होते. वाघमारे आणि साथीदारांविरुद्ध मोकाची कारवाई करण्याचा प्रस्ताव सहकारनगर पोलिस ठाण्याचे वरिष्ठ पोलिस निरीक्षक सुरेंद्र माळाळे, गुन्हे शाखेचे निरीक्षक संदीप देशमाने यांनी तयार केला होता.

या प्रस्तावाची पडताळणी अतिरिक्त आयुक्त प्रवीणकुमार पाटील, उपायुक्त स्मार्तना पाटील यांनी केली. त्यानंतर पोलिस आयुक्त रितेश कुमार यांनी मोकाची कारवाई करण्याचे आदेश दिला.