बारावी विद्यार्थ्यांचे भवितव्य अधांतरी

पुणे, ता. २१ : बारावीच्या मुख्य परीक्षेत अनुत्तीर्ण होणाऱ्या विद्यार्थ्यांचे शैक्षणिक नुकसान टाळण्यासाठी पुरवणी परीक्षा जुलै-ऑगस्टमध्ये घेतली जाते. पुरवणी परीक्षेत उत्तीर्ण होणाऱ्या विद्यार्थ्यांना पुढील अभ्यासक्रमासाठी प्रवेश घेता यावा, हा त्यामागील उद्देश. परंतु राज्य सामाईक प्रवेश परीक्षा कक्षाने (सीईटी सेल) पुरवणी परीक्षेचा निकाल जाहीर होण्यापूर्वीच काही अभ्यासक्रमांची प्रवेश प्रक्रिया संपवत हात वर केले आहेत. त्यामुळे पुरवणी परीक्षेच्या निकालाच्या प्रतीक्षेत असणाऱ्या विद्यार्थ्यांचे भवितव्य अधांतरी आहे.
बारावी बोर्डाच्या परीक्षेत अनुत्तीर्ण झालेल्या विद्यार्थ्यांसाठी यापूर्वी ऑक्टोबरमध्ये पुरवणी परीक्षा घेण्यात येत होती. परंतु विद्यार्थ्यांचे वर्ष वाया जाऊन शैक्षणिक नुकसान होत होते. त्यामुळे राज्य सरकारने बारावीची पुरवणी परीक्षा जुलै-ऑगस्टमध्ये घेण्याचा निर्णय घेतला. त्यानुसार २०१५पासून पुरवणी परीक्षा जुलै-ऑगस्टमध्ये घेतली जात आहे. परंतु आता या मुख्य उद्देशाला बगल देण्याचे काम राज्य सरकारच्या सीईटी सेलमार्फत होत आहे. सध्या सीईटी सेलने विधी अभ्यासक्रमाची प्रवेश प्रक्रिया पूर्ण केली आहे. त्यामुळे पुरवणी परीक्षा दिलेल्या आणि विधी अभ्यासक्रमाच्या सीईटीत पात्र ठरलेल्या विद्यार्थ्यांच्या अपेक्षा अपुऱ्या राहण्याची चिन्हे आहेत. तर अभियांत्रिकी अभ्यासक्रमाच्या प्रवेशासाठी ‘नॉन कॅप’ अंतर्गत विद्यार्थ्यांना २५ ऑगस्टपर्यंत मुदत आहे. परंतु या कालावधीत पुरवणी परीक्षेचा निकाल जाहीर न झाल्यास अभियांत्रिकीच्या प्रवेशासाठी सीईटीत पात्र ठरूनही विद्यार्थ्यांच्या भवितव्यावर टांगती तलवार आहे.

‘सीईटी सेल’चे म्हणणे
‘‘व्यावसायिक अभ्यासक्रमाच्या प्रवेश प्रक्रियेला आधीच उशीर होत आहे. सीईटी सेल अंतर्गत होणाऱ्या प्रवेश प्रक्रियेत आणखी विलंब करून चालणार नाही. त्यामुळे बारावीच्या पुरवणी परीक्षेचा निकाल लागेपर्यंत प्रवेश प्रक्रिया थांबविता येणार नाही,’’ असे सीईटी सेलतर्फे सांगण्यात आले.

दहावी-बारावीच्या पुरवणी परीक्षेचा निकाल ऑगस्ट अखेरपर्यंत लावण्यासाठी महाराष्ट्र राज्य माध्यमिक व उच्च माध्यमिक शिक्षण मंडळ प्रयत्नशील आहे.
- अनुराधा ओक, सचिव, माध्यमिक व उच्च माध्यमिक शिक्षण मंडळ

.........