Land Acquisition : कात्रज-कोंढवा रस्त्याचे भूसंपादन ऑक्टोबरपूर्वी करणार - विक्रम कुमार

पुणे - भूसंपादनामुळे रखडलेल्या कात्रज-कोंढवा रस्त्याचे रुंदीकरण करण्यासाठी ऑक्टोबरपूर्वी जागा ताब्यात घेऊन लगेच त्याचे काम सुरू करू, असे महापालिका आयुक्त विक्रम कुमार यांनी स्पष्ट केले. मात्र, राज्य सरकारकडून मंजूर झालेले २०० कोटी रुपये अद्याप महापालिकेच्या तिजोरीत जमा न झाल्याने भूसंपादन कसे करणार, हा प्रश्‍न उपस्थित झाला आहे.

कात्रज-कोंढवा रस्ता सध्या ३२ मीटरचा असला तरी तो अपुरा आहे. त्यामुळे महापालिकेने ८४ मीटरपर्यंत रुंदीकरणाचा निर्णय घेतला. मात्र भूसंपादनाअभावी गेल्या पाच वर्षांत केवळ २८ टक्के काम पूर्ण झाले आहे. या रस्त्यात ज्यांच्या जमिनी जाणार आहेत, त्यांनी महापालिकेकडे रोख नुकसानभरपाई मागितलेली आहे. ‘टीडीआर’, ‘एफएसआय’च्या रूपात मोबदला घेण्यास जागामालकांनी नकार दिला आहे.

महापालिकेला या प्रकल्पासाठी २ लाख ८८ हजार चौरस मीटर जागा आवश्‍यक असून, अद्याप १ लाख २८ हजार चौरस मीटर जागेचे भूसंपादन झालेले नाही. त्यामुळे हे काम ठप्प आहे. जागामालकांना रोख मोबदला देता यावा, यासाठी महापालिकेने ८४ मीटरऐवजी ५० मीटरचा रस्ता विकसित करण्याचा निर्णय घेतला आहे. भूसंपादनासाठी २८० कोटी रुपये आवश्‍यक आहेत. त्यातील २०० कोटी रुपये राज्य सरकार देणार आहे. उपमुख्यमंत्री देवेंद्र फडणवीस यांनी नुकतेच २०० कोटी रुपये मंजूर केल्याचे पुण्यात बोलताना स्पष्ट केले होते. पण हा निधी अद्याप महापालिकेच्या तिजोरीत जमा झालेला नाही. त्यामुळे महापालिका भूसंपादन कसे करणार, असा प्रश्‍न उपस्थित झाला आहे.

महापालिकेच्या भूसंपादन विभागाने रुंदीकरणात ज्या जागा मालकांचे भूखंड येतात, त्यांची यादी तयार केली आहे. त्यानुसार शासकीय नियमाने त्यांना मोबदला दिला जाणार आहे.

कात्रज-कोंढवा रस्त्याच्या भूसंपदनासाठी २०० कोटी रुपये मंजूर झाले आहेत, हे पैसे लवकरच मिळतील. जागामालकांची यादीही तयार केली आहेत. पैसे मिळताच भूसंपादनाची प्रक्रिया ऑक्टोबरपर्यंत पूर्ण केली जाईल. त्यानंतर रस्त्याचे काम सुरू होईल. पुढील काही महिन्यांत कात्रज-कोंढवा रस्त्याचे रुंदीकरणाचे काम पूर्ण होऊ होईल.

- विक्रम कुमार, आयुक्त, महापालिका