वाहतूक कोंडी टाळण्यासाठी उपाय करावेत

पुणे, ता. १ : शहरात पावसाळ्यात होणाऱ्या वाहतूक कोंडीच्या अनुषंगाने सर्व उपाययोजनांची कामे संबंधित यंत्रणांनी लवकरात लवकर पूर्ण करावीत, असे निर्देश पोलिस आयुक्त रितेश कुमार आणि महापालिका आयुक्त विक्रम कुमार यांनी दिले आहेत. मॉन्सूनपूर्व तयारीच्या अनुषंगाने पोलिस आयुक्तालयात गुरुवारी (ता. ३१) झालेल्या बैठकीत हे निर्देश देण्यात आले.

शहरात मेट्रो मार्ग, मेट्रो स्थानकांची कामे सुरू असल्याने त्याचा राडारोडा रस्त्यावर आहे. तसेच, उड्डाणपुलांची कामे आणि स्मार्ट सिटींतर्गत सुरू असलेल्या खोदकामामुळे पावसाचे पाणी साचत असलेल्या ठिकाणांच्या उपाययोजनांविषयी या बैठकीत चर्चा करण्यात आली. पुणे स्मार्ट सिटीचे मुख्य कार्यकारी अधिकारी संजय कोलते, पोलिस सह आयुक्त संदीप कर्णिक, शहर वाहतूक शाखेचे पोलिस उपायुक्त विजयकुमार मगर, महापालिकेचे अतिरिक्त आयुक्त विकास ढाकणे यांच्यासह वरिष्ठ पोलिस अधिकारी तसेच महामेट्रो, टाटा मेट्रो, पी.एम.आर.डी.ए, सार्वजनिक बांधकाम विभाग, कॅन्टोन्मेंट मंडळ, पी.एम.पी.एम.एलचे अधिकारी या वेळी उपस्थित होते.

वाहतूक नियमनासाठी अतिरिक्त वॉर्डन
गटारे, नालेसफाईची कामे गतीने पूर्ण करावीत. गटारांची तुटलेली झाकणे बदलावीत. पावसाळी वाहिन्या, पिण्याच्या पाण्याची वाहिन्याच्या कामामुळे रस्त्यात पडलेला राडारोडा काढून घेण्यात याव्यात. याशिवाय वाहतूक नियमनासाठी पुणे महापालिका, महामेट्रो, टाटा मेट्रो यांच्याकडून वाहतूक शाखेस अतिरिक्त वॉर्डन पुरविण्याचे निर्देश महापालिका आयुक्तांनी दिले. आंबिल ओढा, कोळेवाडी नाला, दळवी नगर चौक, आंबेगाव नाला, जांभूळवाडी नालेसफाईबाबत चर्चा करण्यात आली. पीएमपी बसेस नादुरुस्त होऊ नयेत, यासाठी दक्षता घ्यावी. वाहतुकीस अडथळा ठरणारी अतिक्रमणे तत्काळ काढावीत, अशा सूचना त्यांनी दिल्या.

नियंत्रण कक्ष तयार करणार
अचानक पाऊस झाल्यास उद्भवणाऱ्या आपत्कालीन परिस्थितीत तत्काळ उपाययोजना करण्यात याव्यात. सर्व संबंधित यंत्रणांचा एकमेकांशी समन्वय राहावा, यासाठी सर्व स्वायत्त संस्थांच्या कार्यालयांमध्ये नियंत्रण कक्ष तयार करण्यात येणार आहे. जलद प्रतिसादासाठी सर्व विभागांच्या अधिकाऱ्यांमध्ये तातडीने संदेशाचे आदान-प्रदान करण्याच्या सूचनाही या वेळी देण्यात आल्या.