शहरातील १३ स्मशानभुमी होणार अद्ययावत

पुणे, ता. १६ : शहराच्या विविध भागातील १३ स्मशानभुमी अद्ययावत करण्यात येणार असून त्यामध्ये पर्यावरण पुरक यंत्रणा, गॅस व विद्युत दाहिन्यांच्या कामांना प्राधान्य देण्यात येणार आहे. ही कामे सध्या सुरू असून लवकरच ती पूर्ण होतील, अशी माहिती महापालिका आयुक्त विक्रम कुमार यांनी दिली.
महापालिका प्रशासनाच्या वैकुंठ स्मशानभूमी, कैलास स्मशानभूमीसह शहराच्या विविध भागात स्मशानभुमी आहेत. काही स्मशानभूमीमध्ये अनेक प्रकारच्या समस्या सातत्याने निर्माण होत आहेत. संबंधित समस्या तातडीने दूर करून तेथे गॅस, विद्युत दाहिनी निर्माण करणे, बदलणे तसेच हवेचे प्रदूषण टाळण्यासाठी पर्यावरणपुरक यंत्रणा बसविण्याचे काम महापालिकेकडून केले जाणार आहे. याबरोबरच स्मशानभुमी अद्ययावत करण्याचे काम महापालिकेने हाती घेतले आहे. विशेषतः बहुतांश स्मशानभूमीमध्ये विद्युत दाहिनी निर्माण करण्यास प्राधान्य दिले जात आहे. त्याचे काम सध्या सुरू आहे. शहरातील खराडी, बावधन, औंध, वाघोली, बोपोडी, हडपसरमधील गंगानगर, धनकवडी, कोथरूड, आंबेगाव, कोरेगाव पार्क आदी भागातील स्मशानभूमीमध्ये संबंधित कामे केली जाणार आहेत.