पुण्याच्या पाणीपुरवठ्यावर बारकाईने लक्ष ः आयुक्त

पुणे, ता. १६ ः पावसाने ओढ दिल्यामुळे शहराला होणाऱ्या पाणीपुरवठ्याकडे आम्ही बारकाईने लक्ष ठेवून आहोत. पावसाची स्थिती बघून ३० जूनला आढावा घेऊ, त्यानंतर हवामान खात्याशी चर्चा करून पुढील दिशा ठरविली जाईल, असे महापालिका आयुक्त विक्रम कुमार यांनी शुक्रवारी स्पष्ट केले.
पुणे शहराला खडकवासला व भामा आसखेड या धरणांमधून पाणीपुरवठा केला जातो. मात्र यंदा पावसाने ओढ दिल्यामुळे धरणातील पाणीसाठ्यावर परिणाम होऊ लागला आहे. त्यामुळे महापालिका प्रशासनाकडून पाणी बचतीवर अधिक भर दिला जात आहे. त्यासाठी पाणी गळती थांबविण्याबरोबरच खराब वॉल्व्ह बदलणे व अन्य कामे करण्यास प्राधान्य दिले जात आहे.
याबाबत विक्रम कुमार म्हणाले, ‘‘मागील वर्षी जून महिन्यात पाऊस झाला होता, या वेळी १५ जूननंतरही पाऊस नाही. २० जूनपर्यंत पाऊस होईल, अशी शक्‍यता आहे. तरीही २८ ते ३० जून या कालावधीत पाण्याची स्थिती महापालिकेकडून पाहिली जाईल. त्यानंतर हवामान खात्याशी चर्चा करून पुढील निर्णय घेण्यात येईल.’’