औषध खरेदीत सरकारचे बाराशे कोटी रुपये वाचणार

पुणे, ता. १७ ः राज्यातील सर्व सरकारी दवाखाने, प्राथमिक आरोग्य केंद्रांना सरकारमार्फत पुरविण्यात येत असलेल्या औषधांच्या खरेदीसाठी स्वतंत्र प्राधिकरण स्थापन करण्यात येणार आहे. या प्राधिकरणामुळे औषध खरेदीतून दरवर्षी सुमारे बाराशे कोटी रूपये वाचतील, असा दावा राज्याचे आरोग्यमंत्री डॉ. तानाजी सावंत यांनी नुकताच येथे एका कार्यक्रमात बोलताना केला.

आरोग्यमंत्री तानाजी सावंत यांच्या हस्ते वैद्यकीय आणि सामाजिक क्षेत्रात भरीव कामगिरी करणाऱ्या डॉक्टरांचा सत्कार करण्यात आला. या वेळी ते बोलत होते. या समारंभाला लोकमतचे समूह संपादक विजय बाविस्कर, सकाळचे संपादक सम्राट फडणीस, पुढारीचे संपादक सुनील माळी, ज्येष्ठ विधीज्ञ एस. के. जैन, राज्य मराठी पत्रकार संघाचे संघटक संजय भोकरे, अध्यक्ष किरण जोशी आदी उपस्थित होते.

डॉ. सावंत पुढे म्हणाले, ‘‘तमिळनाडू पॅटर्नच्या धर्तीवर राज्यात हे औषध खरेदीसाठीचे प्राधिकरण स्थापन करण्यात येणार आहे. तसेच पुण्यातील जिल्हा रुग्णालयाची जागा पीपीपी तत्त्वावर विकसित करणे, सर्व नागरिकांना आरोग्य कार्ड देणे आणि पत्रकारांसाठी आरोग्य विमा सुरू करण्यात येणार आहे. जिल्हा रुग्णालयाच्या जागेवर पीपीपी मॉडेलद्वारे १५०० खाटांचे रुग्णालय, ३०० खाटांचे मनोरुग्णालय, ३०० खाटांचे कर्करोग उपचार रुग्णालय, परिचारिका महाविद्यालय आणि रुग्णांचे दोन हजार नातेवाईक राहू शकतील, इतक्या क्षमतेचे निवासस्थान बांधले जाणार आहे. यासाठी २० हजार कोटी रुपये खर्च येणार आहे.’’