शहरातील विविध चर्चमध्ये फादर्स डे उत्साहात साजरा

पुणे, ता. १८ ः वडिलांची कर्तव्ये, त्यांच्या जबाबदाऱ्या व मुलांवर होणारे संस्कार याबाबतचा संदेश, त्याचबरोबर नागरिकांना केक, गुलाबपुष्प देऊन रविवारी शहरातील बहुतांश चर्चमध्ये फादर्स डे उत्साहात साजरा करण्यात आला.

शहरातील बहुतांश चर्चमध्ये फादर्स डेनिमित्त रविवारी सकाळी व सायंकाळी विशेष कार्यक्रम घेण्यात आले. धर्मगुरुंनी ‘वडिलांची कर्तव्ये, त्यांच्या जबाबदाऱ्या व मुलांवर होणारे संस्कार’ या विषयावर उपस्थितांना संदेश दिला. ख्राईस्ट चर्च (रास्ता पेठ), चर्च ऑफ द होलीनेम (गुरुवार पेठ), सेंट मॅथ्युज चर्च (डॉ. बाबासाहेब आंबेडकर रस्ता), देशपांडे चर्च (कसबा पेठ), इम्यॅन्युअल चर्च (महात्मा फुले पेठ), सेंट मेरी चर्च (खडकी), मेथडीस्ट मराठी चर्च, सेंट मेरी चर्च (पुलगेट), सेंट पॉल चर्च (सांगवी), सेंट क्रिस्पीन मराठी चर्च (कर्वे रस्ता), सत्याची जिवंत मंडळी चर्च (येरवडा) या चर्चमध्ये फादर्स डे उत्साहात साजरा करण्यात आला. बिशप ॲन्ड्रु राठोड, धर्मगुरू संजय ठाकुर, अभिषेक विवेक रॉजर्स, चंद्रशेखर जाधव, सुधीर गायकवाड, फ्रान्सीस कसबे आदी धर्मगुरुंनी उपस्थितांना मार्गदर्शन केले. या चर्चसमवेत शहरातील अन्य चर्चमध्ये फादर्स डेनिमित्त विविध प्रकारच्या कार्यक्रमांचे आयोजन केले होते. कार्यक्रमात सहभागी झालेल्यांना केक, गुलाबपुष्प व विविध प्रकारच्या भेटवस्तू देण्यात आल्या, अशी माहिती चर्च ऑफ होलीनेमचे कार्यकर्ते सुधीर चांदेकर यांनी दिली.