राज्यात आजपासून पशुगगणना

पुणे, ता. २४ ः राज्यात एकविसाव्या पशुगणनेला सोमवार (ता. २५) पासून सुरुवात होत आहे. आधुनिक तंत्रज्ञानाचा अवलंब करत मोबाइल ॲपच्या माध्यमातून ही पशुगणना होणार आहे, अशी माहिती पशुसंवर्धन आयुक्तालयाचे सहसंचालक सुषमा जाधव यांनी दिली.
पशुपालन ग्रामीण अर्थव्यवस्थेचा कणा आहे. अर्थव्यवस्थेत याचे लक्षणीय योगदान आहे. शासनाला नियोजनासाठी पायाभूत सांख्यिकीची आवश्यकता असून ही माहिती गणनेच्या स्वरूपात गोळा केली जाते. पशुधनामध्ये महाराष्ट्र संपन्न राज्य असून, देशात सातव्या क्रमांकावर आहे. तसेच कुक्कुट व कुक्कुट पक्षी यामध्ये पाचव्या क्रमांकावर आहे. पशुधनाच्या निरंतर विकासासाठी आणि चांगल्या योजना आखण्यासाठी पशुगणना महत्त्वपूर्ण भूमिका निभावत असते. पशुपालन पूरक उत्पन्ननिर्मिती बरोबरच दूध, अंडी व मांस ही पशुधन उत्पादने पोषक आहाराचा महत्त्वाचा स्रोत आहे. प्रत्येक पाच वर्षांनी पशुगणना घेण्यात येत आहे. २०१९ मध्ये विसाव्या पशुगणनेमध्ये प्रथमच प्रजाती व ग्रामीण आणि नागरी क्षेत्रनिहाय पशुधनाची आकडेवारी गोळा करण्यात आली. विसाव्या पशुगणनेच्या अहवालानुसार राज्यात एकूण तीन कोटी ३० लाख ८० हजार पशुधन असून, मागील पशुगणनेच्या तुलनेत १.८३ टक्क्यांची वाढ झाली. या वेळच्या पशुगणनेच्या माध्यमातून राज्यातील नागरी व ग्रामीण क्षेत्रनिहाय कुटुंब, कौटुंबिक उपक्रम, बिगर-कौटुंबिक उपक्रम आणि संस्था, गोशाळा यांच्याकडे असलेल्या आणि राज्यात आढळणाऱ्या १६ पशुधन प्रजाती व कुक्कुट पक्षी यांची जातीनिहाय, वयोगट तसेच लिंगनिहाय आकडेवारी गोळा केली जाणार आहे. ही पशुगणना नोव्हेंबर ते फेब्रुवारी २०२५ या कालावधीत होणार असल्याचे जाधव यांनी सांगितले.